Çudia e fundit e Fullanit, ai ka falsifikuar edhe… emrin e vet

13 Gusht 2014, 08:03, Opinione CNA

Nga Kastriot Myfraraj

Sipas faqes zyrtare online të Bankës së Shqipërisë, guvernator i bankës qendrore është Ardian Fullani. Por në Regjistrin e Gjendjes Civile të Republikës së Shqipërisë nuk ekziston një person me emrin Ardian Fullani. Në regjistrin e gjendjes civile ekziston vetëm një person me emrin Adrian Fullani, i datëlindjes 15 janar 1955, i lindur në Tiranë, i biri i Janit dhe i Elenës. Ky është pikërisht ?heroi? ynë i këtyre ditëve, për këtë nuk ka asnjë dyshim. Të dhënat e ?Ardian Fullanit? dhe të Adrian Fullanit përputhen në gjithçka, datëlindja, vendlindja, atësia, amësia, gruaja, fëmijët. Gruaja e guvernatorit, Arjana Fullani, sipas regjistrit të gjendjes civile është gruaja e Adrian Fullanit jo e Ardian Fullanit. Dy fëmijët e guvernatorit, Eriku dhe Fiona, sipas regjistrit të gjendjes civile janë fëmijët e Adrian Fullanit, jo të Ardian Fullanit.
Kështu, Adrian Fullani ka përdorur një emër të dytë informal, atë ?Ardian? në detyrat publike që ka mbajtur. Se përse e ka bërë këtë gjë, për shkak të një çrregullim personaliteti, ose për një arsye tjetër më të ndërlikuar, ende nuk mund të thuhet me siguri. Gjithsesi është e sigurt se njeriu i cili drejton që prej dhjetë viteve bankën qendrore të Shqipërisë, ka gënjyer deri edhe për emrin e vet.
Problemi është se në vitin 2004 Presidenti i Republikës ka emëruar Ardian Fullanin si Guvernator të Bankës së Shqipërisë dhe jo Adrian Fullanin. Kuvendi gjithashtu ka zgjedhur Ardian Fullanin dhe jo Adrian Fullanin si Guvernator. E njëjta gjë është përsëritur në 2011. Askush në të dy rastet nuk ka menduar për të verifikuar emrin e personit që do t? i jepej kjo detyrë e lartë. Në 2004 Kryeministri Fatos Nano i dërgoi Presidentit emrin e Ardian Fullanit dhe ai e dekretoi e më pas Kuvendi me shumicë socialiste, e votoi atë. Në Gazetën Zyrtare u publikua emërimi i Ardian Fullanit në postin e Guvernatorit të Bankës së Shqipërisë. E njëjta histori u përsërit në vitin 2011 kur tashmë në pushtet ishte PD dhe Kryeministër ishte Berisha. Në origjinë të kësaj ngatërrese pra është Fatos Nano, i cili e njihte mikun e tij me emrin Ardian Fullani, që ky e përdorte vetë dhe këtë emër dërgoi Nano te Presidenti. Më pas, kur erdhi koha që Fullani të rizgjidhet, emri i tij informal u quajt i mirëqenë dhe askush nuk bëri verifikime.
Dhe që nga ajo kohë Adrian Fullani ka nënshkruar shkresat zyrtare, duke perfshire edhe kartmonedhat, me emrin informal Ardian Fullani. Presidenti dhe Kuvendi kanë emëruar, përkatësisht zgjedhur guvernator të Bankës së Shqipërisë një person që nuk ekziston fare. Dekreti i botuar në gazetën zyrtare është i pavlefshëm për shkak se përmban emrin e një njeriu i cili nuk ekziston, të Ardian Fullanit. Është praktika e zakonshme zyrtare që kur shkruhet gabim një emer në një dekret, atëhere del një dekret tjetër, ku evidentohet gabimi në dekretin fillestar dhe bëhet ndreqja, duke u shkruar emri i saktë. Pastaj ky dekret i dytë botohet në gazetën zyrtare. Vetëm pas kesaj dekreti i pare merr fuqi të plote. Madje, kur bëhen gabime në emrat e personave të cilët lenë shtetësinë shqiptare për te marre nje te huaj, atëherë bëhet një dekret tjetër nga Presidenti me të cilin korrigjohet gabimi dhe ky dekret i dytë botohet në gazetën zyrtare. Ndryshe dekreti i parë nuk eshte i vlefshëm. Fakti që detyrën e guvernatorit e ka ushtruar një person që mban një emër të ndryshëm nga ai emër që është dekretuar Guvernator i Bankës së Shqipërisë do të thotë se të gjitha kartmonedhat shqiptare në qarkullim ose rezervë, të nënshkruara prej tij, nuk janë të vlefshme për arsye se në to ka nenshkruar një person me emër të ndryshëm nga ai i cili është emëruar Guvernator prej Presidentit dhe është zgjedhur në këtë detyrë nga Kuvendi.
Merret vesh, në rrethana normale do të kishte qenë e pamundur që Adrian Fullani të drejtonte Bankën e Shqipërisë për dhjetë vite me emrin Ardian Fullani. Por duket se Fullanit nuk i ka kërkuar askush ndonjë dokument identiteti kur është paraqitur në Bankën e Shqipërisë për të marrë detyrën, e as më pas kur ka marrë pagën e tij të lartë, shpërblimet, dietat etj. Gjithçka kalohej në llogarinë e tij bankare. Ata që kryenin veprimet ishin njerëz që e dinin se nuk duhet të pyesnin për gjëra që nuk kishin të bënin drejtpërdrejt me ta.
Tashmë një gjë është e sigurt, banka qendrore është një kaos të plotë, duke nisur që nga emri i drejtuesit kryesor të saj, që mban detyrën e dyfishtë të Guvernatorit dhe kryetarit të Këshillit Mbikqyrës të kësaj banke. Nëse një pensionisti që është transferuar nga një qytet tjetër në Tiranë, i është shkruar gabim një gërmë e emrit, ai nuk e merr dot pensionin pa u rregulluar ky lapsus. Por del se dikush mund të bëhet dy herë guvernator i bankës qendrore me emër të ndryshuar në mënyrë informale dhe të ketë në dorë Thesarin e shtetit. Gjithsesi, ky fakt e bën shumë më të thjeshtë çështjen e shkarkimit të Guvernatorit të Bankës së Shqipërisë. Guvernator i Bankës së Shqipërisë është zgjedhur Ardian Fullani, i cili është një person që nuk ekziston në Shqipëri. Detyrën e Guvernatorit e ushtron me të padrejtë Adrian Fullani i cili nuk ka asnjë të drejtë të ligjshme për ta ushtruar këtë detyrë. Shtetasi Adrian Fullani nuk mund të tregojë asnjë akt zyrtar me të cilin të vërtetojë se është emëruar dhe zgjedhur guvernator i bankës qendrore. E thënë shkurt, atë nuk duhet ta lejojë roja te dera e jashtme për të hyrë në zyrën e tij/