E fundit!

13:19 Aktualitet

Braho “shuplakë” politikës: Më vjen mirë që SPAK është i papëlqyer nga të dyja kahet

Kreu i SPAK, Klodjan Braho i ka dhënë një shuplakë politik...

Tri ekipe në Serinë A kërkojnë shërbimet e Skukës

6 Janar 2023, 08:19, Sport CNA

Partizani ka në skuadër një nga lojtarët më të mirë të Kategorisë Superiore, Xhuliano Skukën. Golat në momente vendimtare, debutimi dhe rrjeta me Kombëtaren, si dhe paraqitja e fundit në derbi, ku vendosi gjithçka, ka bërë që plot tri klube të Serisë A të kthejnë sytë nga dibrani dhe të provojnë të ulen në tavolinë me Partizanin. Listës së të interesuarve i është shtuar edhe Empoli.

HELLAS VERONA – Drejtori i skautëve të klubit verdheblu, Dritan Dervishi, dhe drejtori sportiv i veronezëve, pas derbit kanë trokitur në derën e Partizanit dhe kanë bërë një ofertë për 24-vjeçarin në drejtim të presidentit Gazment Demi.

Oferta fillestare mësohet të ketë qenë 500 mijë euro, një shifër, së cilës kreu i klubit të kuq i është përgjigjur negativisht në mënyrë të prerë.

Italianët më pas kanë analizuar situatën dhe pretendimet e të kuqve dhe mësohet të jenë kthyer me një ofertë shumë më të përmirësuar, rreth 750 mijë euro, plus 25% të së drejtës së kartonit. Gjithsesi, as kjo ofertë nuk e ka bindur Partizanin.

Negociatat vijojnë, me Hellas Veronën, që shtyn dita-ditës për dibranin dhe Partizanin, që nuk kërkon të zbresë poshtë 1 milionëshit, plus përqindje të kartonit.

LEÇE – Lorenzo Kolombo është lojtari që lidhet me transferimin e mundshëm të Skukës te Leçe.

20-vjeçari italian është në pronësi të Milanit dhe paraqitjet e tij të mira i bëjnë kuqezinjtë që ta kthejnë përfundimisht në verë.

Leçe është vënë në lëvizje për ta zëvendësuar dhe ka zgjedhur Skukën, të cilin është gati ta marrë që në këtë merkato për t’i dhënë kohë ambientimi.

EMPOLI - Trajneri aktual i ish-skuadrës së Hysajt, Paolo Zaneti, ka qenë i pranishëm në “Air Albania” gjatë derbit të luajtur në fund të dhjetorit, me qëllim për të parë nga afër Xhuliano Skukën.

Sulmuesi, i cili zgjoi interesin e italianëve, që me atë shpërthim të frikshëm në minutat e fundit në miqësoren ndaj të kaltërve, shënoi edhe golin e fitores ndaj Tiranës dhe me siguri ka lënë përshtypje të mira te trajneri italian, i cili i njeh mjaft mirë shqiptarët, pasi ka në skuadër Ardian Ismajlin dhe Nedim Bajramin.

Në ditët në vijim pritet që edhe Empoli të prezantojë ofertën e vet për Skukën./ Panorama Sport