E fundit!

20:02 Aktualitet

Tubimi i 34-të kundër qeverisë/ Protestuesit mbërrijnë para Kryeministrisë

Ka nisur protesta e 34-të kundër qeverisë në bulevardin “D...

Sot, Shqipëri-Serbi! Luhet vetëm për fitore

7 Qershor 2025, 07:24, Sport CNA

Kombëtarja shqiptare do të zhvillojë një nga ndeshjet më të rëndësishme, në kuadër të kualifikueseve për Kupën e Botës. Mbrëmjen e kësaj të shtune, në stadiumin “Air Albania” në Tiranë, kuqezinjtë do të përballen me Serbinë, në një sfidë që mbart vlera të mëdha sportive dhe jo vetëm.

Kjo është vetëm hera e tretë që dy kombëtaret ballkanike përballen në nivel ndërkombëtar dhe tensioni historik mes dy vendeve ka bërë që kjo sfidë të vlerësohet si delikate.

Ndeshja e parë mes Shqipërisë dhe Serbisë u zhvillua në vitin 2014 në Beograd dhe u ndërpre për shkak të incidenteve ku tifozët u futën në fushë dhe sulmuan lojtarët shqiptarë.

Shqipëria vjen në këtë përballje pas dy ndeshjeve në grup, me një fitore dhe një humbje në ndeshjet e para. Fitorja ka ardhur në shtëpi kundër Andorrës me rezultatin 3-0, ndërsa humbja është regjistruar në transfertë ndaj Anglisë. Trajneri Silvinjo ka theksuar se ekipi është në ndërtim e sipër dhe se objektivi kryesor mbetet kualifikimi në një Botëror për herë të parë në histori.

Kundërshtari, Serbia, vjen në këtë përballje me një bilanc pozitiv në ndeshjet e fundit. Skuadra e drejtuar nga trajneri Dragan Stojkovi? është e motivuar për të siguruar pjesëmarrjen në Kupën e Botës për herë të tretë radhazi.

Serbët vijnë nga një fitore ndaj Austrisë në play-off të Ligës së Kombeve, e cila u siguroi atyre qëndrimin në nivelin më të lartë të garës. Gjatë ciklit të mëparshëm kualifikues, Serbia nuk pësoi asnjë humbje (6 fitore dhe 2 barazime), ndërsa në 18 ndeshjet e fundit të këtij lloj formati ka regjistruar vetëm një disfatë.

Megjithatë, forma jashtë fushe e Serbisë nuk ka qenë optimale së fundmi. Në katër ndeshjet e fundit si udhëtues pas Kampionatit Europian të verës së kaluar, ata nuk kanë arritur asnjë fitore, duke marrë 2 barazime dhe 2 humbje. Kjo statistikë mund të shërbejë si një faktor që i jep shpresë Shqipërisë për të shfrytëzuar avantazhin e fushës dhe mbështetjen e publikut vendas në “Air Albania”.

Masat e sigurisë për këtë ndeshje janë të rrepta, për shkak të ndjeshmërisë politike dhe historike që shoqëron përballjen. Autoritetet kanë angazhuar rreth 2 mijë forca sigurie, përfshirë njësi speciale dhe struktura të antiterrorit.

Ndeshja Shqipëri-Serbi, do të luhet mbrëmjen e kësaj të shtune, duke nisur nga ora 20:45, në stadiumin “Air Albania”.