web counter
LEXO PA REKLAMA!

SHKARKO APP

App Store
Google Play

Shqipëri-Ukrainë, përballja në shifra

19 Nëntor 2024, 10:00, Sport CNA

Shqipëri-Ukrainë, përballja në shifra

Kombëtarja shqiptare pret Ukrainën këtë të martë, në ndeshjen e vlefshme për raundin e fundit në grupet e Ligës së Kombeve.

Në “Air Albania”, pritet të jetë një ndeshje tejet e luftuar, për shkak se fitorja është jetike për të dyja ekipet.

Sa i përket shifrave, Shqipëria njeh vetëm një fitore në histori ndaj Ukrainës dhe ajo u regjistrua në fazën e parë në këtë edicion. Kombëtarja ukrainase, nuk është e preferuara për kombëtaren kuqezi, pasi ndaj tyre kemi një bilanc totalisht për tu harruar.

Dy kombëtaret janë përballur shtatë herë mes tyre në të kaluarën, ku pesë herë kanë fituar ukrainasit, një ndeshje është mbyllur në barazim, ndërsa një fitore i takon Shqipërisë.

Shifra që nuk ngrohin ambientin e kombëtares shqiptare, gjithsesi, motivimi duhet të gjendet tek ajo fitore me përmbysje, 1-2 e regjistruar në ndeshjen e parë të këtij edicioni të Ligës së Kombeve.

Shenjë e mirë mund të konsiderohet fakti që kuqezinjtë kanë gjetur rrjetën në të katër sfidat e fundit ndaj ukrainasve, përfshirë kualifikuesen e Kupës së Botës 2006 dhe dy miqësoret e humbura në fushat neutrale në Itali e Francë. Sfida e kësaj të marte është tepër vendimtare për fatin e skuadrave të gjendura në grupin B1.

Katër ekipet janë në garë për vendin e parë, ndërsa aktualisht favorizohet Çekia, që mban vendin e parë me 8 pikë, ndërsa ndjekin Gjeorgjia e Shqipëria me nga 7 pikë, ndërsa Ukraina renditet e fundit me 5 pikë.

Shqipëria është e detyruar të fitojë me Ukrainën që të ketë mundësinë të jetë e para në grup në Ligën e Kombeve. Por kjo nuk varet vetëm nga përballja e kuqezinjve, pasi ndërthuret me rezultatin e takimit Çeki-Gjeorgji. Kjo sfidë duhet të përfundojë në barazim e Kombëtarja kuqezi ta mbyllë në krye që do ta ngjiste në Ligën A dhe të shpresojë të jetë pjesë e “play off” të Botërorit 2026 në bazë të renditjes së përgjithshme.





Lajmet e fundit nga