web counter
LEXO PA REKLAMA!

SHKARKO APP

App Store
Google Play

Shënoi tripletë, Vrioni me dedikim prekës: Tre golat janë për Olivian

27 Korrik 2023, 18:20, Sport CNA

Shënoi tripletë, Vrioni me dedikim prekës: Tre golat janë

Xhakomo Vrioni ka qenë protagonisti absolut i fitores së Nju Inglënd ndaj Atletiko de San Luis, në Kupën e Ligës. Sulmuesi i kombëtare shqiptare shënoi 3 gola në këtë sfidë, në suksesin 5-1 të skuadrës së tij.

Një arritje e shkëlqyer për futbollistin shqiptar, i cili në fund të sfidës, kishte një dedikim mallëngjyes për këtë fitore dhe për tre rrjetat e tundura prej tij në këtë duel. Ai shpjegoi se golat ishin për familjen e Bred Najton, ish-futbollistit të Nju Inglënd, i cili tashmë është trajner në akademinë e klubit, pasi pak ditë më parë u nda nga jeta në mënyrë tragjike vajza e tij 11-vjeçare.

“Jam i lumtur që fituam dhe dua t’ia kushtoj këtë fitore Olivias. Ajo u nda nga jeta pak ditë më parë dhe këto gola e kjo fitore është për të”, tha Vrioni për mediat pas sfidës.

Kjo ishte përgjigja më e mirë për skuadrën e cila siguroi me fitoren e sotme pjesëmarrjen në turin tjetër, edhe pse kishte humbur ndeshjen e parë ndaj Nju Jork Red Bulls. “Ishte e rëndësishme pasi ne humbëm ndaj Red Bulls dhe unë gabova penallti. Përgjigja më e mirë që mund të jepja ishte në fushën e lojës.

Të tre golat ishin shumë të bukur. Nuk ka rëndësi se si shënon, pasi ka mënyra të ndryshme për ta bërë një gjë të tillë, unë jam i lumtur.

Ne punojmë për këtë gjë, ka raste kur ia dalim e raste të tjera ku nuk ia dalim. Kemi punuar shumë në aspektin mbrojtës, ndërsa në aspektin sulmues bëmë maksimumin me një fitore shumë të bukur. Ia dolëm si skuadër dhe jemi të lumtur. Tani ecim përpara në këtë kompeticion, pasi duam të provojmë ta fitojmë”, tha Vrioni i cili po bëhet gjithnjë e më shumë protagonist në futbollin amerikan, pas një viti të parë me luhatje përtej Atlantikut.





Lajmet e fundit nga