web counter
LEXO PA REKLAMA!

SHKARKO APP

App Store
Google Play

E fundit!

x

Partizani gjithçka për gjithçka, trajneri Gega merr lajmin e keq

25 Prill 2025, 21:10, Sport CNA

Partizani gjithçka për gjithçka, trajneri Gega merr lajmin e

Të dielën, në “Arenën e Demave”, Partizani do të luajë ndeshjen më të rëndësishme të sezonit, ndoshta edhe më të rëndësishmen e viteve të fundit. Një sezon që kishte nisur me ambicie të mëdha, me pretendime për titull dhe synime për të shkuar sa më larg në Kupë, është kthyer në një rrugëtim plot zhgënjime dhe kthesa të papritura. E gjitha vjen duke marrë formën e një sezoni që mund të përfundojë me dështim total nëse “demat e kuq” nuk arrijnë të mposhtin Elbasanin dhe të sigurojnë një vend në “Final 4”, që hap rrugën për në Europë.

Gjërat nuk kanë shkuar aspak sipas planit për Partizanin. Pas një faze të parë relativisht të qëndrueshme dhe që i mbajti në zonën e sipërme të renditjes, muajt e fundit kanë qenë një rënie graduale. Të kuqtë u eliminuan nga Kupa pas një përmbysjeje nga Egnatia, duke humbur një nga rrugët më të shpejta për t’u kthyer në arenën europiane. Para kësaj, ishte humbja ndaj Bylisit, që i zbriti nga vendi i katërt dhe për herë të parë gjatë gjithë kampionatit i nxori jashtë “Final 4”.

Tani, çdo shpresë dhe objektiv varet nga një përballje direkte ndaj Elbasanit, një ekip që vjen në formë të shkëlqyer, plot besim dhe që në letër ka avantazhin e rezultateve direkte. Me të njëjtën kuotë pikësh si Partizani, Elbasanit i mjafton një barazim për të siguruar vendin e katërt dhe për të shkuar në fazën finale.

Përveç presionit të jashtëzakonshëm psikologjik, trajneri Skënder Gega duhet të përballet edhe me një situatë alarmante me dëmtimet. Ndeshja e fundit kundër Egnatias nuk solli vetëm eliminimin, por edhe dy mungesa të reja të rëndësishme: Janjeva dhe Mehmeti lanë fushën të dëmtuar dhe sipas të gjitha gjasave nuk do të jenë gati për duelin ndaj Elbasanit. Edhe Buxhelaj, që mungoi në atë sfidë, mbetet në pikëpyetje të madhe, ndërsa Zeka e ka mbyllur zyrtarisht sezonin.

Në një situatë të tillë, Gega pritet të detyrohet të improvizojë sërish, të kombinojë elementët e mbetur për të ndërtuar një formacion kompetitiv që të mbajë gjallë shpresat e tifozëve të kuq. Me një Elbasan që është shndërruar në një prej skuadrave më të qëndrueshme të pjesës së dytë të sezonit, fitorja duket sfidë e vështirë.





Lajmet e fundit nga