Orges Shehi: Bëjmë vetëvrasje nëse e nënvlerësojmë Kukësin

4 Mars 2024, 14:35, Sport CNA

Orges Shehi: Bëjmë vetëvrasje nëse e

Trajneri i Partizanit, Orges Shehi, foli për mediat, në prag të sfidës së kthimit në Kupë ndaj Kukësit.

Shehi deklaroi se skuadra nuk duhet ta nënvlerësojë kundërshtarin, pavarësisht fitores minimale në ndeshjen e parë. Tekniku i të kuqve, zbuloi edhe tri mungesat për këtë përballje.

“Mendoj që është një përballje Kupe me dy takime dhe takimin e parë e kemi fituar në transfertë 1 – 0. Na pret përsëri një 90-minutësh tjetër që kërkon vlerësim pa pasur parasysh rezultatin e ndeshjes së parë, sepse në futboll situatat janë shumë të rëndësishme dhe do të kemi vlerësimin maksimal për të kaluar në gjysmëfinalet e Kupës së Shqipërisë”.

Gjendja është e njëjtë me situatën e para 3 ditëve. Nga lojtarët e dëmtuar nuk kemi ndonjë që mund t'i bashkohet grupit. Skuka dhe Keko po zhvillojnë një program të veçantë për të arritur gjendjen e tyre fizike më të mirë. Rrapaj dihet që mungon si rezultat i dënimit të Disiplinës.

Kupa është një kompeticion që çdo skuadër synon t'i shkojë deri në fund. Si Kupa dhe kampionati për ne janë dy kompeticione të rëndësishme pa hequr dorë edhe nga Superkupa. E kemi vlerësuar maksimalisht dhe do të kërkojmë t'i shkojmë deri në fund këtij kompeticioni.

Kjo nuk është për herë të parë. Sigurisht në një kampionat me 4 faza përfshirë edhe Kupën normalisht që do të përballesh edhe 6 herë me një skuadër. Patjetër që merr një vlerësim ndryshe kur ndeshjet janë afër. Ajo ku duhet të fokusohemi është që ne të kalojmë më tej, pavarësisht se çfarë kundërshtari ke përpara.

Në fund të majit merren verdiktet e të gjithë sezonit, deri atëherë ka kohë. E thashë edhe pak më parë që ne kemi vlerësimin tonë maksimal për të kaluar në gjysmëfinalen e Kupës. Kërkojmë që të jemi sa më shumë kërkues në çdo lloj komponenti me kundërshtarin e nesërm. Në fund fare do të merren edhe të gjitha verdiktet e sezonit.

Në kampionatin tonë nuk ka skuadra të lehta, janë të gjitha të vështira. Këtë e kanë treguar edhe rezultatet kundër çdo lloj kundërshtari. Që pas ndeshjes me Kukësin të nesërmen kemi qenë në stërvitje me mendjen që duhet të jemi seriozë dhe të shkojmë sa më larg. Nëse do të arrrijmë që të kemi dozë nënvlerësimi atëherë do të bënim vetëvrasje. Nuk besoj që asnjë nga lojtarët apo nga stafi të ketë nënvlerësim për ndeshjen e nesërme.

Ne kemi një grup lojtarësh, duke përfshirë edhe dëmtimet nuk kemi shumë njerëz për të ndryshuar, ndonjë element edhe mund të ketë. E kam thënë gjithmonë nëse do të ketë ndonjë lëvizje apo rotacion, grupi tjetër është i gatshëm dhe nuk mund të ndryshojmë gjithë skuadrën dhe të prishim gjithë strukturën", deklaroi Shehi.