Nga familja tek ëndrrat, zbulohet intervista e 13-vjeçarit Mesi. Djaloshi që la pas sëmundjen dhe donte të bëhej…

18 Dhjetor 2022, 09:59, Sport CNA

Dihet thuajse gjithçka për Lionel Mesin, kapitenin e Argjentinës, por mesa duket bota e 35-vjeçarit është edhe më e larmishme nga ajo që mendonim.

Mungesa e hormonit të rritjes që u desh t’i administrohej djaloshit me kalimin e tij tek akademia e Barcelonës dhe më pas zërat për një tjetër sëmundje, sindromën e Aspergerit (një formë e lehtë e autizmit), që nuk u konfirmua asnjëherë, e kanë bërë edhe më të veçantë historinë e “Pleshtit”, që do të luajë një tjetër finale Botërori.

Por atëherë kur nuk e dinte se do të bëhej ai heroi i të gjithë fëmijëve, e në veçanti atyre argjentinas, 13-vjeçari Leo, që kishte tërhequr vëmendjen për paraqitjet e tij ndërsa ishte ende pjesë e Neuells Olld Bois rrëfehej për “La Capital”, gazetën e qytetit të vendlindjes së tij Rosario, ku ndër të tjera tregonte për idhujt e pasionet, librat dhe ushqimin.

Një hero? – Dy, babai im Horge dhe kumbari im Klaudio.

Trajneri i preferuar? – Të gjithë ata që kam pasur, kam mësuar shumë nga të gjithë (Gabriel, Morales, Domingez, Vekio e Koria).

Lojtari i preferuar? – Dy, im vëlla dhe kushëriri.

Skuadra e zemrës? – Neuells.

Pasionet? – Të dëgjoj muzikë, në veçanti Kuarteto e Kumbia.

Një program televiziv? – Primicias.

Libri i preferuar? – Bibla.

Filmi i preferuar? – Shëtitja e bebit.

Modelja e preferuar? – Nikol Numan.

Ushqimi i preferuar? – Pulë me salcë.

Lënda e preferuar në shkollë? – Gjuha spanjolle.

Profesioni që do të donit? –Mësues i edukimit fizik.