E fundit!

08:34 Kronika

Operacion antidrogë në Malësinë e Krujës, Krujë dhe Thumanë

Autoritetet kanë kryer një operacion të gjerë antidrogë në...

Miqësia e madhe u kthye në armiqësi? Gazetari francez zbulon konfliktin mes Mbapesë dhe Nejmarit

15 Gusht 2022, 11:36, Sport CNA

Mbape dhe Nejmar dikur ishin një dyshe që kuptoheshin mjaft mirë me njëri-tjetrin jo vetëm në fushën e lojës, por edhe jashtë saj. Në festat e shpeshta të brazilianit nuk mungonte asnjëherë Mbape, aq sa shumë opinionistë i kërkonin të distancohej për të shpëtuar karrierën e tij. Por këto ditë tashmë i përkasin vetëm së shkuarës. Gjërat kanë ndryshuar në Paris dhe miqësia e madhe tashmë është kthyer në një armiqësi.

Marrëdhënia mes Nejmarit dhe Mbapesë është krisur qysh në sezonin e shkuar. Sulmuesi francez rinovi kontratën në fund të muajit maj. Një kontratë e cila e kthente 23-vjeçarin në "zot" të PSG-së. Sigurisht që francezi ka shfrytëzuar pushtetin që i jep kontrata e re, duke i kërkuar klubit që të shesë Nejmarin.

Braziliani e ka zbuluar një fakt të tillë dhe tensionet mes tyre tashmë nuk mund të mohohen. Këtë e konfirmon gazetari francez, Molina, i cili shkruan në llogarinë e tij në rrjetet sociale: “Nuk ka një problem me penalltitë te PSG-ja. Problemi është te një lojtar që u kërkon drejtuesve të shesin një tjetër lojtar, duke besuar se ai nuk do të vihet në dijeni".

Mbape dhe Nejmari treguan mbrëmjen e djeshme se gjërat nuk shkojnë siç duhet mes tyre. Francezi është ekzekutuesi i penalltive në skuadrën parisiene, por pas humbjes së 11-metërshit të parë, në penalltinë e dytë Nejmar vendos ta marrë vetë përsipër ekzekutimin, pavarësisht se Mbape kërkonte të drejtën e gjuajtjes së 11-metërshit.