E fundit!

08:34 Kronika

Operacion antidrogë në Malësinë e Krujës, Krujë dhe Thumanë

Autoritetet kanë kryer një operacion të gjerë antidrogë në...

Hodhi në erë negociatat e “Djajve”, Van Dajk e rrëmbeu Gakponë me një… telefonatë

28 Dhjetor 2022, 16:27, Sport CNA

Transferimi surprizë i Kodi Gakposë te Liverpuli ka ardhur edhe falë ndërhyrjes së Virxhil van Dajkut. “Reds”-at hodhën në erë përpjekjet e Mançester Junajtidit për të transferuar sulmuesin holandez, duke arritur akordin me klubin e PSV-së për 44 milionë paund (50 milionë euro) mbrëmjen e vonë të 26 dhjetorit.

Dhe për të ndryshuar trajektoren e 23-vjeçarit, i cili dukej i destinuar drejt “Old Trafford”, ka ndikuar edhe një telefonatë e rëndësishme në momentet e fundit e mbrojtësit të Liverpulit dhe kapitenit të kombëtares së Holandës, Virxhil van Dajk.

Sipas gazetës lokale “Eindhovens Dagblad”, Van Dajk i telefonoi shokut të tij të kombëtares për ta bindur që të transferohej në “Anfield Road”. Dhe kjo është një nga arsyet përse Gakpo u bind që të zgjidhte në fund skuadrën e Jyrgen Klopit. Shumë prej ekipeve më të mëdha të Europës ishin të interesuara për shërbimet e yllit të PSV-së, i cili bëri një paraqitje fantastike edhe në Botëror me “Tulipanët”. Mançester Junajtid kishte kohë që kishte nisur bisedimet me klubin holandez, por nuk kishte arritur ende të bënte një ofertë konkrete financiare dhe të hënën mori goditjen duke humbur një prej objektivave kryesore të merkatos së vetë që prej verës së shkuar. Liverpulit i duhej një sulmues pas dëmtimit të rëndë në gju të Luis Diazit, ndërsa Darvin Nunjez po vuan që të gjejë ritmin e tij në Premier Ligë pas transferimit nga Benfika.

Pas fitores së Liverpulit ndaj Aston Vilës 3-1 të martën, ku Van Dajk shënoi edhe një nga golat, qendërmbrojtësi tha se skuadrës i duheshin fytyra të reja në merkaton e janarit: “Shpresojmë që lojtarët e dëmtuar të rikthehen shpejtë dhe urojmë që të mund të mirëpresim disa lojtarë të rinj në klubin tonë. Të shohim. Mendoj se cilësia është gjithnjë e mirëpritur te Liverpuli”. Van Dajk ka folur gjithnjë me superlativa për Gakponë dhe elozhet e fundit të kapitenit për talentin e Holandës erdhën gjatë Botërorit të Katarit: “Shpresojmë që Kodi të shkojë deri në hënë dhe të kthehet përsëri. Ai është një lojtar shumë i mirë, por edhe djalë i mirë gjithashtu. Ajo që ne shohim në stërvitje është ajo që ju shihni në fushë. Ka ende shumë potencial dhe unë shpresoj që ai të vazhdojë që ta tregojë për ne. Jemi të gjithë të kënaqur me të”.