web counter
LEXO PA REKLAMA!

SHKARKO APP

App Store
Google Play

E fundit!

x

Drejtori sportiv i Partizanit: Nuk e shikojmë të nevojshme të bëjmë merkato. Skuka? Çmimet i vendos tregu

28 Dhjetor 2022, 14:09, Sport CNA
Drejtori sportiv i Partizanit: Nuk e shikojmë të nevojshme të
Elton Marini

Partizani duket në rrugë të drejtë dhe një “dorë” të mirë në këtë performancë të të kuqve ka edhe Elton Marini. Drejtori sportiv i të kuqve ka folur për mediet duke analizuar punën e deritanishme të skuadrave.

Ai nuk e fsheh lumturinë që skuadra e tij ndodhet në vend të parë. Ka treguar se si do të punohet në merkaton e janarit, ndërsa në fund e ka mbyllur me shitjet e mundshme të futbollistëve.

“Le të themi që në vija të përgjithshme kemi bërë një performancë të mirë. Ndoshta nuk jemi konsoliduar aty ku duhet, por po punohet shumë, duhet të marrim parasysh që skuadra ka ndryshuar shumë në këtë fillim sezoni. Ka ndryshuar drejtimi teknik. Politika gjithashtu shihet që është ndryshe, po i japim më shumë rëndësi elementit shqiptar dhe sidomos elementit të ri vendas.

Jemi të kënaqur që jemi në vend të parë, ndoshta shumë njerëz shikojnë vetëm rezultatet e ndeshjeve teke siç është derbi, por ne jemi të kënaqur në përgjithësi. Kemi shumë rrugë përpara, vendi i parë na jep vetbesim dhe një motivim më tepër që në fund të sezonit të arrijmë objektivat që i kemi vënë vetes.

Merkato? Po mundohemi se çfarë mund të na ofrojë tregu vendas dhe më pas ndonjë opsion tjetër që mund të kemi. Nuk dëshirojmë që të prishim edhe ekuilibrat në skuadër, nuk e ndiejmë nevojën që të bëjmë merkato me çdo kusht. Ky klub mirëpret çdo lojtar të mirë ose cilësor që mund të na ofrohet. Janari ka një specifikë të veçantë sepse konsiderohet si tregu i riparimeve dhe nuk ka të njëjtat karakteristika si në qershor. Ne po presim çdo opsion të mirë dhe po përpiqemi të evidentojmë ndonjë lojtar që mund të na ndihmojë.

Një emër lojtari? Kjo është pyetje një milionë dollarëshe. Kemi disa elementë në mendje, por është shumë herët për të folur.

Objektivi? Objektivi i Partizanit nuk besoj se ka nevojë për të pyetur, sepse Partizani është nga ato klube që ka detyrim moral të fitojë maksimumin e objektivave madhorë. Ne jemi në luftë për të dy trofetë që janë në lojë, si Kupa ashtu edhe kampionati dhe shpresoj që t’ia dalim në fund. Më pas nëpërmjet kësaj filozofie dëshirojmë të arrijmë sa më lart në Kupat e Europës atë që është “thembra e Akilit”.

Ofertat? Telefonata ka plot. Ne jemi një staf që punojmë shumë ngushtë me njëri-tjetrin, si presidenti, stafi dhe trajneri dhe kemi vendosur që shumicën e gjërave që na ofrohen me materiale të dobëta filmike, jo të mos i marrim në konsideratë, por të jemi më të kujdesshëm sepse vëzhgimi vizual nga afër i lojtarëve është më i rëndësishëm nga ato që të ofrohen me mesazhe ose me video.

Udhëtimet? Duhet pyetur agjenti zyrtar i klubit për udhëtimet, por që kur kam marrë detyrën kam bërë më shumë se 30 udhëtime.

Ofertat për futbollistët e kuq? Ne na bëhet qejfi që nëpërmjet punës kemi çuar 4 lojtarë në ekipin kombëtar. Ky është një promovim mjaft i mirë për kampionatin tonë, edhe pse mund të ketë skeptikë, është parë se këta djem e kanë merituar.

Kuptohet pas këtij evidentimi në ekipin kombëtar edhe tregu shtohet, sepse lojtarët janë më të kërkuar kur janë pjesë e ekipeve Kombëtare. Oferta verbale dhe interesime ka, por klubi nuk kërkon që të prishë një projekt që e ka nisur në këmbim të një ofertë në janar. Mendoj që në janar për daljet nuk do të kemi ndonjë lëvizje, përveç në rast se ofrohet ndonjë shifër e çmendur që më pas do të duhet ta mendojmë.

Skuka? Çmimet i vendos tregu, nuk i vendosim ne. Është herët të flasim. Le ta lëmë atë djalë të punojë i qetë dhe dita e tij do të vijë shumë shpejtë”.





Lajmet e fundit nga