Frashëri: Skënderbeu nis ringritjen nga… Korabi

11 Nëntor 2022, 21:39, Sport CNA

Frashëri: Skënderbeu nis ringritjen nga… Korabi

Erlis Frasheri

Skënderbeu synon të mbyllë në mënyrën më të mirë të mundshme pjesën e parë të kampionatit. Pas dy barazimeve radhazi në shtëpi me Besëlidhjen dhe Flamurtarin, korçarët do të kërkojnë rikthimin te rezultatet pozitive në dy ndeshjet e fundit para pauzës 1-mujore, fillimisht të hënën në Peshkopi ndaj Korabit, e më pas ndeshjen e prapambetur me Apoloninë (axhenda e papërcaktuar ende).

Në kampin bardhekuq janë të bindur se mund të marrin maksimumin në Dibër, përtej vështirësisë së ndeshjes. I këtij mendimi është edhe një prej lojtarëve me më shumë eksperiencë në skuadër si Erlis Frashëri. Korçari i krahut të djathtë, në një prononcim për “Panorama Sport”, tregon se dy barazimet e fundit kanë qenë më tepër për mungesë fati. “Nuk jemi atje ku duhet dhe dy ndeshjet e fundit na kanë penalizuar së tepërmi. Kemi dhe një ndeshje më pak, por këto dy barazimet në shtëpi na kanë zbritur disi në renditje.

Megjithatë, kanë qenë dy takime që kurrsesi nuk duhet të linim pikë, sikurse ndaj Besëlidhjes, por edhe përballë Flamurtarit. Nuk ka qenë problemi ynë dhe këtë e them me siguri, por një moment jo, mungesë e theksuar e fatit. Mjafton të shohësh statistikat e këtyre dy takimeve.

Ne kemi prodhuar më shumë se 7-8 raste për gol, ndërsa jemi ndëshkuar në goditjen e parë të kundërshtarit. Vetëm dy raste i kemi lejuar kundërshtarit dhe e kemi pësuar. Kjo është ajo që na ka penalizuar”, ka thënë fillimisht mbrojtësi që mban edhe shiritin e kapitenit të Skënderbeut. Frashëri e njeh mirë fushën e Peshkopisë, pasi ka luajtur me Korabin shtatë vite më parë.

“Është koha që të ringrihemi dhe besoj se në ndeshjen ndaj Korabit do ta bëjmë një gjë të tillë. Nuk trembemi nga transferta, pasi në këto javë më shumë pikë kemi marrë jashtë fushe sesa në shtëpi. Kështu që, do të shkojmë në Dibër me objektivin e vetëm, fitoren e kësaj ndeshjeje.

Sigurisht, na pret ndeshje e vështirë, pasi Korabi ka ekip të mirë, por jemi të bindur se cilësinë e kemi për t’ia dalë”, përfundoi Frashëri, për të cilin është sezoni i dytë radhazi te bardhekuqtë. 34-vjeçari që luan në të gjithë linjën e djathtë iu bashkua korçarëve në Superiore, ndërsa për disa vite u aktivizua në Kosovë me Gjilanin dhe Drenicën