Formacioni më i mirë i javës, Skënderbeu përfaqësohet me Liçon

4 Tetor 2022, 20:48, Sport CNA

Formacioni më i mirë i javës, Skënderbeu

Ndeshjet e qeta dhe pa polemika, tashmë i përkasin së shkuarës. Kategoria e Parë merr zyrtarisht “zjarr”. Java e 4-t ka vënë në akuzë arbitrat dhe duhet thënë që pamjet filmike dëshmojnë se në disa momente e kanë bërë vërtetë baltë. Nuk kanë munguar përmbysjet, fitoret bindëse, përplasjet, kartonët e verdhë e të kuq dhe supershtesat. Ishte java e kryendeshjeve kjo, por edhe që duhet të sillte konfirmimin. E megjithatë, kjo e dyta nuk ndodhi.

Pritej që Dinamo të tregonte forcën dhe supremacinë në Berat, por nuk mori më shumë se një pikë. Tomori mund të kishte fituar, madje gjeti edhe avantazhin me anë të Ervis Çaços. Gjithsesi, mendoi Redon Danaj që të shmangte humbjen, në një përballje që zgjati 99 minuta.

Janë ende në “pod”, por jo vetëm. Po e ndajnë kreun me Tërbunin dhe Korabin. Pukjanët kthyen Besëlidhjen në Lezhë. Edhe pse Da Silva dhe Nunes shënuan shpejt, vendësit si kishin bërë fort mirë llogaritë. Hysa e Tafili barazuan pa shkuar në pushim, ndërsa Xhebrahimi bëri heroin dhe dha pikët e plota. Në Peshkopi festuan vendësit, por me shumë siklete dhe protesta.

Korabi gjeti rrjetën me Lalën dhe më pas Beshirajn, ndonëse goli i fitores erdhi nga faulli. Kryesori Sulko gaboi që la avantazhin, në një kohë që duhet të jepte edhe karton për lojtarin dibran. Cërrikasit nuk hoqën dorë sidoqoftë dhe ngushtuan shifrat me Sotën, madje në fund mund të barazonin, por i doli edhe shtylla kundër. Në Vlorë pati “samba”. Flamurtari “fiku” Besën për vetëm 34 minuta, pas rrjetave të Jurit dhe Oliveirës.

Kavajasit ishin pa busull në këtë transfertë dhe për rrjedhojë u larguan duarbosh. Ia del edhe Burreli në shtëpi përballë Orikut. Një “shkrepje” e Florenc Farrukut solli pikët e para të plota për matjanët. Orikasit luajtën mirë dhe patën raste, por vetëm kaq. Shumë zhurmë edhe në Shijak, atje ku Luzi priste Skënderbeun, shrkuan "Panorama Sport" Kavajasit shënuan të parët me Ferrajn, por Abubakar dhe Pusi sollën përmbysjen. E megjithatë, jo gjithçka shkoi kaq qetë.

Skuadra e Lorenc Pashjas ndihet e vjedhur. Pretendojnë se barazimi erdhi me gol me dorë, ndërsa ankohen edhe për një top që kaloi vijën fatale dhe mund t’u jepte të paktën një pikë. Tjetër “muzikë” pati në Fier, atje ku luhej derbi i Myzeqesë. Apolonia pa trajner dhe me të rinj, “gjunjëzoi” Lushnjën qe po trumbeton me të madhe investimet e bëra dhe buxhet elitë.

Maksuti, Umejiego dhe Kurti mjaftuan për trepikësh, në një ndeshje që pati edhe tre kartonë të kuq dhe shumë nerva mes lojtarëve. Nuk munguan as akuzat nga kampi mik, ndërsa Klodian Duro qartazi deklaronte: “Dy gola fierakët i gjetën falë bujarisë së arbitrave…”

Formacioni më i mirë i javës:

Formacioni më i mirë i javës, Skënderbeu