VIDEO/ Erzeni “fundos” Teutën, shijakasit triumfojnë me përmbysje

14 Nëntor 2022, 14:58, Sport CNA

Teuta vazhdon të mos njohë fitore në kampionat. Durrsakët kanë regjistruar humbjen e radhës ditën e sotme.

Erzeni ka triumfuar në derbi, me përmbysje, me rezultatin 2-1. Ndonëse skuadra e Shkëmbit kaloi në avantazh me Lorenco Vilën në minutën e 49-të, por ky avantazh zgjati vetëm 6 minuta, pasi në minutën e 55-të, Kahrimanovic vendosi baraspeshën.

Në minutën e 69-të, ishte Nonato që përmbysi rezultatin, duke përfituar nga një top në zonë.

Me këtë fitore, Erzeni ngjitet përkohësisht në vendin e dytë me 20 pikë, ndërsa Teuta mbetet e fundit me 8 pikë.

FT | TEUTA 1-2 ERZENI

L. Vila 48′ / Kahrimanoviç 54′, Nonato 69′

RENDITJA –

KOMENTI LIVE –

PËRFUNDON SFIDA!

90′ Arbitri i katërt, Silvio Dyrmishi, ka akorduar 4 minuta shtesë!

89′ Përsëri Erzeni kryen zëvendësim, largohet nga fusha e blertë Kadriu, në vendin e tij, Tiub.

86′ Shijakasit bëjnë lëvizje tjetër, largohet autori i golit të parë, Amir Kahrimanoviç, për t’i bërë vend Alanit.

85′ Bledi Shkëmbi bën dy zëvendësime, ku largohen Emiljano Vila dhe Albion Marku për Aldrit Oshafin dhe David Gjinollarin.

81′ Erzeni kryen zëvendësim, largohet Ilirid Ademi në vendin e tij Ardit Iljazi.

79′ Karton i verdhë edhe për Hektor Idrizajn pas një ndërhyrjeje në kundërkohë në dëm të kundërshtarit.

77′ Teuta kryen një tjetër lëvizje, largohet Beqja, në vendin e tij Boçi.

74′ Me karton të verdhë gjithashtu është ndëshkuar edhe Enk për të besuarit e Xhevahir Kapllanit.

72′ Aleksandër Kuro është ndëshkuar me karton të verdhë.

69′ GOOOL ERZENI 1-2! Shijakasit përmbysin gjithçka me Patrik Nonaton. Sulmuesi brazilian gjendet i vetëm përpara portierit Pano Qirko pas pasimit dhe aksionit perfekt nga Ilirid Ademi, teksa ka shënuar golin e përmbysjes.

61′ Teuta kryen lëvizjen e parë, teksa largohet Ildi Gruda, në vendin e tij Arbër Çyrbja.

59′ Ndeshje me shumë ritëm ku po luhet nga njëra anë në tjetrën. Skuadrat janë në kërkim të golit të avantazhit.

54′ GOOOL ERZENI 1-1! Rikthehet shumë shpejt baraspesha, Amir Kahrimanoviç shënon një gol mjaft të bukur nga jashtë zone.

48′ GOOOL TEUTA 1-0! Zhbllokohet derbi i Durrësit! Lorenco Vila kalon në avantazh skuadrën durrsake pas disa driblimeve duke qenë i saktë përpara porte duke mposhtur Dashamir Xhikën.

46′ Nis pjesa e dytë! Erzeni shkelmon topin e parë të fraksionit të dytë të lojës.

PËRFUNDON PJESA E PARË!

45′ Arbitri i katërt, Silvio Dyrmishi ka akorduar 2 minuta shtesë!

44′ “Ndizet” sfida, Erzeni pranë golit! Kahrimanoviç kroson në zonë nga goditja e dënimit, por me kokë Enk gabon duke e dërguar topin jashtë.

40′ Shpërthejnë protestat! Teksa Teuta pretendon penallti pas një pengimi në zonë.

39′ Tani është Teuta ajo që provon me kapitenin, Emiljano Vilën nga një goditje me kokë nga këndi, por topi përfundon jashtë.

33′ Erzeni rrezikshëm, teksa provohet rasti i parë për gol! Pano Qirko bën ndërhyrje vendimtare ndaj Amir Kahrimanoviç duke i mohuar goditjen dhe golin shijakasve.

28′ Erando Karabeci provon portën nga një distancë e konsiderueshme në goditje dënimi, por topi përfundon shumë larg portës së mbrojtur nga Dashamir Xhika.

26′ Vjen kartoni i parë i verdhë i takimit! Kapiteni i Erzenit, Gëzim Krasniqi ka goditur në fillim kundërshtarin me takën lart dhe më pas topin, me arbitrin kryesor, Enea Jorgji, i cili e ndëshkon me të verdhë menjëherë.

21′ Teuta provon të befasojë shijakasit me një kundërsulm me Ildi Grudën, me këtë të fundit që gabon duke shtyrë shumë topin dhe me portierin Dashamir Xhikën që e bën topin për vete.

17′ Ledjo Beqja mbetet i dëmtuar pas një përplasje me kundërshtarin, por edhe për të asgjë serioze.

14′ Erzeni provon kundërsulmin me Peposhin, por mbrojtja e Teutës tregohet e saktë duke mbyllur rrezikun.

8′ Ildi Gruda mbetet i dëmtuar duke marrë një goditje pas kokës, me stafin mjekësor të Teutës që hynë në fushë për ta mjekuar, por asgjë serioze.

7′ Prej disa minutash ekipi i drejtuar nga Bledi Shkëmbi po tregohet rrezikshëm duke prodhuar disa raste për gol, por duke qenë të pasaktë përpara portës.

4′ Teuta kryen një goditje këndi, por portieri Xhika ka grushtuar topin.

1′ Starton derbi i Durrësit! Teuta shkelmon topin e parë të takimit.