web counter
LEXO PA REKLAMA!

SHKARKO APP

App Store
Google Play

Epoka e trajnerëve italianë, Colella pranë historisë me Partizanin

26 Maj 2023, 14:26, Sport CNA

Partizani është shumë pranë titullit kampion për herë të 17-të në histori. Të kuqtë përfituan maksimalisht nga barazimi i Tiranës me Bylisin dhe një javë para përfundimit të kampionatit kryesojnë renditjen. Kjo falë avantazhit të ndeshjeve direkte në derbi, pasi Partizani ka triumfuar dy herë, një sfidë e kanë fituar bardheblutë dhe ndeshja e fundit përfundoi në barazim.

Partizani do të luajë ndeshjen e fundit të kampionatit në shtëpi përballë Teutës aty ku pritet të vendoset gjithçka. “Demave” u mjafton vetëm fitorja për të festuar titullin e 17-të në histori, që do të kishte një rëndësi të veçantë, pasi për herë të parë një trajner italian do të fitonte titullin kampion me Partizanin.

Në epokën e presidentit Demi, Partizani është udhëhequr në disa raste nga trajner italian, por asnjë nuk ia ka dalë mbanë të triumfojë në kampionat. Më i suksesshmi mund të konsiderohet Adolfo Sormani i cili në sezonin 2016-2017 udhëhoqi Partizanin në kualifikimin historik përballë Ferencvaros në turin e dytë eliminator të Champions League.

Më tej “të kuqtë” u ndalën në raundin e tretë nga Salzburg dhe në "play off"-in e Europa League u eliminuan nga Krasnodar. Trajneri Sormani premtonte shumë për të ardhmen, megjithatë 57-vjeçari dështoi në kampionat dhe u largua ende pa u mbylluar faza e parë. Drejtuesit e Partizanit vendosën ta rikthenin teknikun italian në sezonin 2019-2020 po sërish aventuara e tij nuk shkoi ashtu siç pritej.

Andrea Agostinelli ishte trajneri me origjinë italiane që i shkoi më pranë fitimit të titullit kampion me Partizanin në sezonin 2015-2016. Gjithçka u vendos në javën e fundit, me Skëndërbeun që triumfoi në Vlorë dhe mbrojti titullin kampion. Më tej aventura e trajnerëve italianë te Partizani si Franco Lerda dhe Mark Luliano ishte një dështim.

Partizani u rikthye te fitimi i titullit kampion pas 26 vitesh me teknikun Skënder Gega në krye, ndërsa tani “të kuqtë” mund të “shkurorëzojnë” rivalët e qytetit nga froni me një italian në krye, si Giovanni Colella.





Lajmet e fundit nga