E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Eliminimi “djeg”, Motta: Te rikthehemi te fitorja

23 Shkurt 2025, 12:26, Sport CNA

Eliminimi nga Liga e Kampioneve ka lënë shije të hidhur te Juventusi dhe bardhezinjtë kërkojnë të rikthehen të fitorja, këtëherë në kampionat.

“Zonja e Vjetër” ka një transfertë delikate ndaj Cagliarit, aty ku fitorja është detyrim. Për të synuar një nga katër vendet e para, skuadra e drejtuar nga Thiago Motta, nuk ka rrugë tjetër përveç tre pikëve.

Në prag të kësaj përballje, tekniku bardhezi pranoi se zhgënjimi për eliminimin nga Liga e Kampioneve ka qenë shumë i madh.

Sipas Mottas, gjëja më e mirë që skuadra e tij mund të bëjë ështëtë mposhtë Kaljarin, si shenjë ngushëllimi.

Trajneri i torinezëve gjithsesi paralajmëroi skuadrën e tij se ndaj Cagliarit do të jetë një ndeshje shumë e vështirë dhe kërkoi përqendrim maksimal.

“Ne jemi të zhgënjyer, të trishtuar dhe të zemëruar, sepse donim kualifikimin në Ligën e Kampioneve. Askush nuk është i lumtur për këtë situatë. Gjëja më e mirë që mund të bëjmë tani është të rikthehemi në fushë me një fitore. Unë respektoj mendimet dhe kritikat, por vazhdoj në rrugën time që është e duhura.

Kemi një ndeshje të komplikuar ndaj Cagliarit. E njohim kundërshtarin dhe vështirësitë e fushës. Synimi ynë është të fitojmë, për të vazhduar rrugëtimin tonë.

Komunikimi është i njëjtë. Unë jam i pari që bëj autokritikë. Ndryshimet u bënë që të merrnim maksimumin në atë ndeshje. Zhgënjimi për eliminimin është i madh. Menduam se mund të kalonim mes 16 më të mirave. Në fushë PSV-ja bëri më mirë se ne. Tani kemi një javë të ngarkuar, duhet të bëjmë gjithçka për të fituar.

Në duhet të përmirësohemi në çdo aspekt të lojës. Duhet të kuptojmë se cila është gjëja e duhur, për të vënë kundërshtarin në vështirësi. Gjëja më e rëndësishme është fitorja dhe jo posedimi i topit. Futbolli i tillë është. Ndonjëherë kemi fituar kur kemi qenë superiorë, ndërsa disa herë nuk kemi fituar edhe kur kemi dominuar.

Ka kaluar shumë kohë që nga ndeshja e parë. Tani situata është ndryshe. Është e vështirë për të gjithë të luajmë në Sardenjë dhe ne i dimë vështirësitë që mund të kemi, por gjithashtu kemi besim se çfarë duhet të bëjmë për t'i hapur probleme kundërshtarit. Ne e respektojmë kundërshtarin, por duam të luajmë lojën tonë dhe ta fitojmë ndeshjen", deklaroi Motta.

Ndeshja Cagliari-Juventus, do të luhet mbrëmjen e kësaj të diele, duke nisur nga ora 20:45.