Ushqyerja e urrejtjes te fëmijët

4 Dhjetor 2023, 14:56, Sociale Lira Gjika

Urrejtja femër - mashkull i ka rrënjët thellë në fëmijëri të njeriut. Dhuna fillon e tirret në familje. Fjalori dhe sjellja e prindërve me njëri-tjetrin, raporti mama - djalë dhe mama - vajzë, po ashtu raporti baba - vajzë, baba - djalë, luajnë një rol vendimtar në këtë fenomen aq të shëmtuar dhe kriminal të dhunës ndaj femrës.

Trajtimi i femrës si person i dorës së dytë, edhe pse flitet shumë, është prezente në jetën e përditshme tonën dhe jo vetëm te ne.

Shprehja se ti je femër, çdo grua e ka dëgjuar dhe e dëgjon duke filluar nga prindërit dhe burri e kudo, madje edhe ajo vetë i drejtohet vajzës së saj në të njëjtën mënyrë. Nëse vërtet duam të shpëtojmë nga kjo e keqe duhet të mësojmë të dallojmë dhunën, fjalët dhe veprimet që e mbajnë gjallë.

Mamatë të mos u kërkojnë vajzave të tyre që edhe pse janë të parat si fëmijë nuk janë të rritura dhe i kërkojnë të kujdesen për vëllain e vogël.

Djemtë t'i nxitin të respektojnë femrën duke i treguar se nëse sillet keq me një femër kjo do të thotë që ai nuk ka një marrëdhënie të mirë me nënën e tij, edhe pse pretendon se e do. Një djalë, një burrë që nuk trajton mirë një femër do të thotë që historia me nënat e tyre është një histori nënshtrimi, frike dhe dhune.

Fëmija duke u rritur në një familje ku ka parë babain që urdhëron, që nxehet, që fyen gruan, nënën e fëmijëve të tij apo gjithë pjesëtarët e familjes dhe nëna e tij duron shumë apo mallkon burrin dhe e nxehur rreh fëmijët e saj.

Kjo mënyrë të jetuari që nuk është aspak e rrallë, pak e nga pak bëhet mënyrë të qeni për fëmijën kur rritet. Asnjë njeri nuk mund të dojë një njeri që e tremb apo që e godet qoftë me një shpullë të lehtë, por fëmija që është totalisht i varur nga të rriturit detyrohet me dhunë të dojë ata që e trembin dhe e dhunojnë.

Ky fëmjë që rritet në mjedise të tilla nuk ka shumë mundësi të bëhet një i rritur e burrë i qetë dhe të mund të dojë apo të respektojë një njeri femër. Ai nuk mund ta dijë se edhe femra është njeri. Po nuk hoqëm dorë nga dhuna, fyerjet, gënjeshtrat, mallkimet diferencimi femër-mashkull, kjo situatë do të vazhdojë të jetë e njëjtë.

Dy janë institucionet ku edukohet kundër dhunës, familja dhe shkolla. T'u mësojmë fëmijëve që jemi njerëz, më pas femra dhe meshkuj.