Sherri mes të rinjve në Bulgarec/ Flasin familjarët: Ishin duke luajtur, ngjarje e momentit

23 Prill 2026, 11:34, Sociale CNA

Sherri mes të rinjve në Bulgarec/ Flasin familjarët: Ishin duke

Një konflikt mes të rinjve ka përfunduar në plagosje me thikë në fshatin Bulgarec të Korçës, duke rikthyer në vëmendje dhunën mes adoleshentëve për motive të dobëta. Ngjarja u shënua mbrëmjen e së mërkurës. Si pasojë, një 16-vjeçar ka mbetur i plagosur, ndërsa autori i dyshuar, rreth 19 vjeç, është shoqëruar nga policia dhe më pas është arrestuar në ambientet e Komisariatit të Korçës.

Gjyshërit e autorit të plagosjes kanë treguar në detaje mbi mënyrën se si e morën vesh ngjarjen e rëndë, teksa ndajnë edhe versionin e tyre.

“Na thanë që kështu-kështu e ka çarë një djalë këtu nga fshati. E ka goditur me thikë në kraharor. Luanin me letra, jo fitova unë, jo fitove ti. Ishin zënë me grushte dhe e kishte goditur me thikë. Jemi të afërt me familjen tjetër, kishim hyrje-dalje edhe fëmija s’kanë pasur gjë. Sherri ka qenë për lojën, siç na llafosi djali. Të shoh djalin si është, atje më rri mendja. Është në shkollë në gjimnaz. S’kemi pasur konflikt me asnjë në fshat, se si na i bëri ai djalë kështu, na plagosi djalin”,-tregon Meliana Bricka, gjyshja e të plagosurit.

Ndërkohë, një tjetër version vjen nga familjarët e autorit, të cilët pretendojnë se gjithçka ka ndodhur në moment dhe si reagim pas një përplasjeje fizike.

“Ai (i plagosuri) e goditi me stekë nipin, nipi ka rënë në tokë. Sipas asaj që na kanë thënë, nipi është ngritur dhe i plagosuri e ka qëlluar prapë, e ka bërë gjak, pastaj ka vepruar nipi. Ngjarja ka ndodhur brenda në lokal. Ne jemi tanët, jemi kushërinj, janë zënë për kot. Nipi im nuk është i sherrit, është djalë i qetë, punëtor. Ne kemi folur me të atin, ai nuk shtron, jemi takuar në spital, nuk pranon. Ne nuk kemi asnjë konflikt me ta. Gjendja e të plagosurit është mirë, nën sqetull ka një gërvishtje. Nipin erdhi e mori policia. Ai pas ngjarjes erdhi në shtëpi dhe na tha se e goditën. Janë gjëra të momentit, jo konflikte të mëparshme, janë zënë për një shok pse i ke thënë këtë, pse i ke thënë atë. Kemi pasur hyrje-dalje në familje”,-u shpreh Shaban Mersinaj, gjyshi i autorit.

Dy versionet e dhëna nga familjarët hedhin dritë mbi rrethanat e paqarta të ngjarjes, ndërsa mbetet për t’u sqaruar plotësisht dinamika e konfliktit. Ndërkohë autoritetet po vijojnë hetimet për zbardhjen e plotë të rastit dhe përcaktimin e përgjegjësive ligjore./CNA