E fundit!

22:56 Sport

LIVE/ Anglia nuk dorëzohet, Bellingham barazon ndaj Norvegjisë

Norvegjia dhe Anglia përballen në stadiumin “Hard Rock” në...

Banorët e Voskopit kërkojnë ndërhyrje urgjente në lumin e Lavdarit: Erozion dhe inerte nga reshjet

4 Maj 2026, 11:09, Sociale CNA

Banorët e Voskopit kërkojnë ndërhyrje urgjente në

Pasojat e reshjeve intensive të muajve nëntor dhe dhjetor vijojnë të mbeten një shqetësim serioz për banorët e fshatit Voskop në Korçë, ku gjurmët e përmbytjeve janë ende të dukshme përgjatë shtratit të lumit të Lavdarit.

Mure mbrojtëse të dëmtuara, struktura betoni të shembura, gurë dhe inerte të shpërndara në të gjithë gjatësinë e lumit, si dhe erozion i theksuar i brigjeve, janë panorama me të cilën përballen çdo ditë banorët e kësaj zone. Në shumë segmente, mbrojtja anësore e lumit është dëmtuar rëndë, ndërsa prania e mbetjeve dhe materialeve të grumbulluara në rrjedhën e ujit rrit ndjeshëm rrezikun e bllokimit të tij, duke shtuar frikën për përmbytje të tjera në rast reshjesh të dendura.

Banorët e Voskopit kërkojnë ndërhyrje urgjente në

Situata konsiderohet veçanërisht alarmante për dhjetëra familje që jetojnë pranë lumit dhe që prej vitesh bashkëjetojnë me frikën se historia mund të përsëritet. Kujtimet e përmbytjeve të mëparshme, veçanërisht ato të vitit 1991, vijojnë të jenë të gjalla për banorët, të cilët tregojnë se uji ka depërtuar deri në banesat e tyre, duke shkaktuar dëme të mëdha materiale dhe duke përmbytur tokat bujqësore.

Sipas banorëve, ndërhyrja nga pushteti vendor ka qenë e kufizuar. Ata shprehen se pastrimi i fundit i lumit është kryer në muajin nëntor dhe që prej asaj kohe nuk është bërë asnjë ndërhyrje tjetër, pavarësisht dëmtimeve të shkaktuara nga reshjet e fundit të dhjetorit.

Banorët e Voskopit kërkojnë ndërhyrje urgjente në

“Ndërhyrja e fundit që është bërë nga bashkia ka qenë në nëntor, vetëm një pastrim, kaq. Po erdhi lumi na rrëmben të gjithëve, na çon në Dunavec. Kemi frikë, lumi të merr. Është një situatë alarmante, duhet ndërhyrje urgjente. Këtu kalon lumi i Lavdarit. Ky është më i rrezikshmi në Shqipëri. E dinë ata më të mëdhenjtë. Reshjet e fundit të dhjetorit e sollën këtë situatë. Është shumë e vështirë. Të na i bëjnë se ne me lopatë s’e bëjmë dot. Në këtë lagje që është me rrezik ne jemi gati 40 shtëpi. Lumi na merr dhe tokat, kemi toka bujqësore, na i prish”-shprehet një banor.

Banorët e kësaj lagjeje tregojnë se frika më e madhe lidhet me mundësinë e një përmbytjeje të papritur gjatë natës, kur reagimi bëhet edhe më i vështirë. Ata thonë se çdo reshje intensive shoqërohet me ankth dhe pasiguri.

Banorët e Voskopit kërkojnë ndërhyrje urgjente në

“Reshjet e fundit e kanë shkatërruar, që në prita edhe deri në fund. Ky lumë është shumë i rrezikshëm. Në ’91 ka dalë dhe ka hyrë nëpër shtëpi dhe ka mbytur gjithë fushën. Lumi i Lavdarit kalon këtu dhe bashkohet me atë të Gjonomadhit. Ky i Lavdarit është shumë i rrezikshëm. Bashkisë i bëjmë thirrje, i bëjmë dhe Zotit. Kjo lagje ka 40 shtëpi, por 10 familje këtu janë më të rrezikuarat. Mua më ka hyrë brenda në dhomë në ’91, mund të përsëritet e njëjta situatë”,-thotë një banor.

Për më të moshuarit, kujtimet e përmbytjeve të viteve të kaluara mbeten ende të freskëta dhe shërbejnë si paralajmërim për atë çfarë mund të ndodhë nëse nuk merren masa konkrete.

“Është shkatërruar totalisht. Unë nuk kam qenë këtu, kam qenë në emigrim, por më thanë që reshjet e fundit të vjeshtës e shkatërruan. Me frikë jetojnë banorët, është lumë, nuk i dihet. Po doli, të mbyt. Bashkia duhet të bëjë mirëmbajtjen e lumit, ta thellojë, ta menaxhojë”,-thekson një banor.

Ndërkohë, banorët ngrenë shqetësimin edhe për cilësinë e ndërhyrjeve të mëparshme, të cilat sipas tyre kanë qenë të përkohshme dhe joefektive.

“Ndihemi të rrezikuar nga lumi. Kur bie shumë shi bëhet përmbytje, vjen deri këtej. I rregullojnë vitin e parë dhe vitin e dytë prishen. Se ashtu i bëjnë. Punimet janë të dobëta. Ata që kanë shtëpitë këtu poshtë janë të rrezikuar më shumë”,-tha banorja e zonës.

Përveç rrezikut për banesat, dëmet po prekin drejtpërdrejt edhe ekonominë familjare të banorëve, pasi një pjesë e konsiderueshme e tokave bujqësore ndodhen pranë lumit dhe çdo dalje e tij nga shtrati sjell humbje të mëdha.

Banorët e Voskopit kërkojnë ndërhyrje urgjente në

Banorët kërkojnë ndërhyrje të menjëhershme nga institucionet përgjegjëse për sistemimin e plotë të shtratit të lumit, forcimin e mbrojtjes anësore dhe pastrimin e materialeve të grumbulluara. Për ta, zgjidhja nuk mund të jetë më një ndërhyrje e përkohshme, por një investim i qëndrueshëm që do të shmangë përsëritjen e skenave dramatike dhe do t’u japë siguri dhjetëra familjeve që jetojnë çdo ditë nën kërcënimin e përmbytjeve./CNA