E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Tri rastet me sëmundjen e skabjes/ Epidemiologu: Nuk ka vend për alarm

4 Nëntor 2024, 13:05, Shëndeti CNA

Pak ditë më parë në juglindje u shfaq sëmundja e skabjes, e njohur ndryshe si zgjebia, e cila ka prekur tre fëmijë në Pogradec. Momentalisht të tria rastet janë izoluar, por shqetësimi nga ana e familjeve mbetet i lartë për shkak se kjo sëmundje infektive përcillet lehtë te personat që mund të kenë kontakt me të prekurit.

Alvi Naum, epidemiolog pranë Njësisë Vendore të Kujdesit Shëndetësor Korçë, ka treguar situatën aktuale në të cilën janë konstatuar tre fëmijët e prekur. Sipas të dhënave, epidemiologu thotë se dy prej rasteve janë banorë të Korçës dhe një tjetër banor i fshatit Veliternë në Maliq.

"Rastet janë shfaqur në Pogradec, kanë qenë homologët tanë të cilët kanë zbuluar tri raste të skabjes dhe na i kanë referuar. Ata janë banorë të Korçës, por janë zbuluar në qytetin e Pogradecit. Një fëmijë është banues në Veliternë, ndërsa dy të tjerët janë banues të qytetit të Korçës. Sipas protokolleve të sëmundjeve infektive, shërbimi i epidemiologjisë ka marrë masat e duhura. Janë lajmëruar mjekët e familjes për ndjekjen e rastit, një ekip është shpërndarë brenda qytetit dhe një tjetër në Veliternë, pranë familjeve për të parë kushtet e higjienës sanitare dhe kushtet e jetesës së atyre fëmijëve."

Sipas epidemiologut, rastet janë sporadike dhe nuk ka vend për alarm, ndërsa po merren të gjitha masat për të kontrolluar kopshtet dhe shkollat në qytete dhe fshatra.

"Çdo gjë është në rregull, mbeten raste sporadike. Ndërkohë që 4 grupe nga shërbimi i epidemiologjisë janë organizuar në NjVKShK, po bëjnë krehjen e zonës në kopshte dhe shkolla, për të kapur rastet, ku deri tani nuk kemi pasur asnjë."

Alvi Naum përcjell në këtë situatë këshillën e mjekëve të cilët bëjnë thirrje që në rast konstatimi të skuqjes së lëkurës apo kruarjeve të forta, t'i drejtohen mjekut specialist për të parë nëse kanë të bëjnë me sëmundjen e skabjes.

"Rastet e evidentuara janë në izolim duke marrë mjekimin nga mjeku specialist dhe deri në shërim të plotë do të rrinë në izolim. Mjekët japin këshilla që në momentin që ka shenja të tipit skuqje e lëkurës, kruarje të forta, duhet patjetër të shkojnë te mjeku specialist për të zbuluar nëse është skabje apo diçka tjetër."

Të tria rastet e konstatuara nga mjekët specialistë janë izoluar në banesat e tyre prej disa ditësh tashmë, ndërsa nga kontrollet e kryera kjo sëmundje ngjitëse jep shenja nga 4 deri në 7 ditë te personat që mund t'u jetë përcjellë nga të prekurit. Epidemiologu theksoi se nuk kemi të bëjmë me një vatër dhe situata mbetet normale me rastet të cilat janë drejt shërimit të plotë./ CNA