Zbulohet plani i Ramës për nesër në Kuvend/ PD vihet në lëvizje, nuk do të shmanget protesta

1 Mars 2023, 12:19, Politikë CNA

Zbulohet plani i Ramës për nesër në Kuvend/ PD vihet në

Nesër në Kuvend do të mbahet mocioni me debat me kryeministrin Edi Rama, për çështjen McGonigal.

Sipas deputetit të PD-së, Edi Paloka, Rama nesër do të vijojë avazin, me 21 Janarin, Gërdecin etj.

“Mund dhe të mos e bënin fare, por ajo që do ndodhë është se nuk do të ketë asnjë përgjigje. Nesër s’do të ketë asnjë përgjigje për çështjen e McGonigal, të vetmet përgjigje që Rama kishte për këtë ai i dha. Kur u pyet pse përmendej 14 herë në aktakuzë tha se jam i gjatë, pra nuk presim ndonjë përgjigje tjetër nesër, dhe ato që do jepen do jenë banale gjithmonë nëse Rama do të vijë në parlament, por dhe po erdhi do të kemi këto përgjigje banale.

Do fillojë avazin 21 Janari, Gërdeci etj etj, këto do jenë të vërteta që do dëgjojmë nesër nga Taulant Balla dhe ushtria shurdhe në parlament. Ata do synojnë ta kthejnë në një seancë të mërzitshme të vazhdojnë me banalitetet e tyre dhe me shpresën se do humbasë çdo gjë. Sa i takon pjesës sonë ne do mbajmë qëndrimet tona, do japim faktet tona”, ka thënë Paloka në një dalje mediatike.

Ende në PD, nuk është vendosur nëse do të protestohet nesër, apo do të marrin pjesë në Kuvend.

Sipas Palokës, kjo do të vendoset në mbledhjen e grupit parlamentar.

“Sa herë që të ketë parlament, jashtë do të ketë protestë, sepse ai parlament është fakt që nuk funksionon më. Unë jam për protesta nga mëngjesi dhe çdo ditë, javë dhe muaj derisa ky njeri të shporret. Madje jam pak për më shumë se kaq.

E kam thënë që Rama duhet tërhequr zvarrë nga ai vend, absolutisht ai do qëruar nga ai vend me çdo mënyrë sepse parlamentin e ka kthyer në kukull, drejtësinë e ka futur në xhep, të gjitha institucionet i ka kapur, pra çfarë të bëjë ky tjetër. S’ka më çfarë të bëjë, çdo shqiptar do e provojë në kurriz të tij se ç'do të thotë.

Më keq do bëhet nga dita në ditë nëse Rama vazhdon të qëndrojë aty sepse do të zhdukë demokracinë, opozitën. Rama duhet të largohet me dhunë, nuk ka mjet tjetër. Shqiptarët duhet të ndërgjegjësohen sepse nëse nuk largohet Rama ditë të zeza do të vijnë për të gjithë”, është shprehur Paloka./CNA.al