E fundit!

16:41 Aktualitet

Marshim dhe thirrje kundër qeverisë/ Mbahet sot protesta e 45-të në Tiranë

Ditën e sotme mbahet protesta e 45-të qytetare kundër qeve...

U dorëhoq si nënkryetare e PD-së/ Tabaku zbulon arsyet

7 Qershor 2023, 09:11, Politikë CNA

Pas mbledhjes së tensionuar të Kryesisë së PD-së së vulës, deputetja Jorida Tabaku është shprehur se PD duhet të organizohet, por nuk është gjetur gjuha e përbashkët dhe mënyra se si duhet të riorganizohet.

Në deklaratën e saj ka nënvizuar faktin se vendimet që do të merren nuk duhet të jenë të nxituara në mënyrë që të mos përsëriten të njëjtat gabime.

“Në gjykimin tim veprimet e tilla të njëanshme si në të shkuarën kanë ndikuar në zvogëlimin e PD-së dhe kanë sjellë në një situatë si kjo e sotmja. Prandaj refuzova të votoj për një vendim që në mendimin tim na dëmton sot për mënyrën se si po merret dhe në kushtet në të cilat po merret!”, ka thënë Tabaku.

Ndër të tjera ajo ka zbuluar edhe arsyen pse është tërhequr edhe nga posti i nënkryetares duke thënë se ky vendim vjen duke parë të gjithë situatën në të cilën ndodhet aktualisht PD-ja e vulës.

Fjala e Jorida Tabakut.

Faleminderit për durimin dhe për pritjen e gjatë. Kryesia e PD-së mbas një mbedhjeje 8 orë të gjata vendosi për të vazhduar përpara me procesin e zgjedhjeve në parti. Kërkesa ime dhe dëshira ka qenë e vetme dhe e thjeshtë, të mos nxitohemi dhe t’u japim demokratëve një proces të drejtë, real dhe që na nderon.

Të gjithë ishim dakord për faktin që PD-ja duhet të riorganizohet, por nuk gjetëm gjuhën e përbashkët për mënyrën se si duhet të riorganizohemi. I kërkova kryesisë të mos marrim vendim të nxituar, çdo vendim i njëanshëm thjesht do të zvogëlojë edhe më shumë partinë tonë dhe nuk do ta zmadhojë atë. Në kushtet që jemi ne nuk kemi luksin të përsërisim të njëjtat gabime!

Pyetja që sot duhet t’i bëjmë vetes është nëse duam një parti të kryetarit apo kryetar për partinë tonë? Ne duhet patjetër të hapim PD-në, duhet të përpiqemi të mos bëjmë procese të njëanshme, duhet të përfshijmë këdo.

Me vlerësimet maksimale për deputetët dhe kontributin e tyre, kolegjit të kryetarëve dhe kontributin e tyre dhe të gjithë ato që kanë qëndruar. U premtova anëtarëve të kryesisë që do të qëndroj deri në fund, derisa mund të gjejmë një zgjidhje që i përfshin të gjithë në proces. Të mos nxitohemi!

Pas vendimit të kryesisë për të vazhduar procesin zgjedhor, kërkova që të gjejmë një dakordësi për mënyrën si?! Në gjykimin tim veprimet e tilla të njëanshme si në të shkuarën kanë ndikuar në zvogëlimin e PD-së dhe kanë sjellë në një situatë si kjo e sotmja. Prandaj refuzova të votoj për një vendim që në mendimin tim na dëmton sot për mënyrën se si po merret dhe në kushtet në të cilat po merret!

Duke pasur parasysh gjithë situatën, vendosa që të tërhiqem edhe nga pozicioni i nënkryetares së PD-së!