Të rinjtë e PS i thurin lavde Ramës: Ku e gjen energjinë

6 Mars 2025, 18:18, Politikë CNA

Pasditen e sotme kryeministri Edi Rama zhvilloi një takim me të rinjtë e Partisë Socialiste.

Në përmbyllje të fjalimit të tij, Rama u pyet nga një “patronazhiste” se ku e gjen ai burimin e energjisë?

Në përgjigjen e tij Rama shprehet se politika për të nuk është karrierë, por një lojë fati që e futi në këtë rrugë.

Gjithashtu kreu i qeverisë u shpreh se ka një zjarr të brendshëm dhe nuk ka nevojë të shpjegojë se ku i gjenë ai energjitë.

Mes të tjerash Rama shton se zjarri vjen si pasion për ta çuar Shqipërinë në BE, por edhe si hakmarrje për të kaluarën.

"Përsa i përket energjisë, kjo është një çështje pak më personale. Për mua politika nuk është profesion, nuk është punë, nuk është zanat jo e jo, nuk është karrierë në kuptimin që i jepet karrierës. Është pasion dhe është mision dhe për hir të vërtetës, nga mënyra sesi ka ndodhur me mua, por po të shikosh momentet kyçe që më kanë bërë të merrem me këtë punë, ka qenë në njëfarë mënyrë fat dhe lojë e fatit më saktë sepse nuk kanë qenë vendimmarrje të menduara gjatë etj, por kanë qenë rrethana dhe e fundit ka të bëjë dhe me historinë. Domethënë, në moshën tuaj unë jetoja në një regjim tjetër, nuk kishte lidhje me këtë sot dhe ishte një betejë për liri personale, nuk kishte lidhje me zgjedhje e me alternativa, ishte betejë për liri personale dhe rrethanat e kanë sjellë që të ngec në këtë valle. Kjo është gjëja.

Un i them “Zjarr i brendshëm”. Në qoftë se kur njeriu, unë të paktën sepse nuk them njeriu sepse njerëzit janë lloj-lloj, por përsa kohë kam këtë zjarrin e brendshëm nuk kam nevojë të mendoj se ku t’i gjej energjitë. Pastaj, nëse zjarri fillon dhe shuhet atëherë do jetë e vështirë për t’i gjetur edhe energjitë dhe kaq. Në këtë gjë më mban ajo që ju thashë, fakti që ne mund ta mbarojmë këtë; Ne, unë se Ogerta me ju do vazhdoni, por fakti që mund ta përmbyllim këtë fazë historike, duke u anëtarësuar në Bashkimin Europian dhe në njëfarë mënyre është dhe një lloj hakmarrjeje për gjithçka që ka ndodhur në të shkuarën, në të gjitha nivelet. Kjo është pak a shumë përgjigja që unë do jepja", shprehet Rama.

Duke dëgjuar këtë përgjigje, shumëkush mund të mendojë: Po mirë, nëse politika qenka një lojë fati, kush na garanton që fati s’do bëjë ndonjë rreng tjetër dhe ta lërë në valle përjetë?/CNA