“Sot është dita e së vërtetës”/ Braçe debate me ministren, nxjerr emrat e “kartelit” në Kuvend

7 Korrik 2022, 14:25, Politikë CNA

“Sot është dita e së vërtetës”/

Ish-zëvendëskryeministri, Erion Braçe, vijon të bëjë “opozitarin” në Kuvend, ndërsa “viktimë” në seancën e sotme ka qenë ministrja e Bujqësisë, Frida Krifca, të cilën e ka thirrur në interpelancë.

Gjatë fjalës së tij, Erion Braçe, ka folur me tone kritike ndaj qeverisë në lidhje me situatën e bujqësisë në vend.

Braçe evidentoi rritjen e kostove të prodhimit nga fermerët dhe kërkoi nga qeveria të publikojë ndihmën e dhënë për bujqit në këtë situatë.

Ai nxori emrat e grumbulluesve që sipas tij, e blejnë shalqinin me një çmim minimal në zonën e Myzeqesë dhe në rajon e shesin disa fish më shtrenjtë.

“Heshtja për një kulturë aq masive sa ç'është shalqini dhe që po zë një peshë shumë të rëndësishme të të gjithë eksportit nga Shqipëria në të gjithë Europën është e papranueshme. Kam monitoruar të dielën deri të martën që ishin ditët e krizës së shalqinit. Sot është dita e së vërtetës, pas një deklarate të gjatë të grumbulluesve që po i dilnin për zot dhe po u shpëtonin jetën bujqërve dhe që unë po ua shkatërroja e kështu me radhë”, tha Braçe.

Sipas tij “'Tomato Al' ka shitur ditën e diel me 23.8 lekë. Të gjithë ata që na dëgjojnë e dinë që të dielën është mbledhur shalqini vetëm me 9 deri në 10 lekë. 'Romir' sh.p.k. është më interesanti, ka shitur të dielën 220 tonë shalqi në Kosovë, e ka mbulur me shalqi. Me 15.5 lekë. 'LB Fruits' 2006, ka shitur në Hungari me 40 lekë. U vjen gjynah këtyre njerëzve që bujqve shkojnë ua marrin me 8-9 lekë për kg dhe për vete e shesin 40 lekë për kg. Fraeno e ka mbledhur në Kosovë me 12 cent dhe 14 cent në Bosnje, ndërkohë që e ka blerë me 8 lekë. 'Doni Fruits' ia shet vetes një herë me 12 cent, një herë me 11 cent”.-tha Braçe.

Ndërsa Krifca tha se bujqësia shqiptare po qëndron në konsistencë duke siguruar sipas saj edhe rritje.

Ministrja Frida Krifca tha se deklaratat se bujqësia janë në vendnumëro, janë lajme të rreme dhe të dëmshme për mobilizimin kombëtar.

"Impakti i luftës në Ukrainë ndikon në koston e prodhimit të fermerëve tanë. Kemi marrë masa për menaxhimin e një situate që nuk e dimë si do të shkojë. Më duhet të qëndroj kundër diskursit politik të opozitës mbi performancën e bujqësisë shqiptare. Zaptimi i zyrave të bujqësisë për të bërë diversion politik është akt i dënueshëm që bujqësinë nuk e ndihmon. Deklarata që bujqësia është në vend numëro, është në pikiatë, është një lajm i rremë, thellësisht i pavërtetë dhe i dëmshëm për mobilizimin kombëtar. Kjo nuk ndihmon, por minon sigurinë ushqimore në vend. Në një situatë të paprecedentë që prek zinxhirin ndërkombëtar transportues bujqësia shqiptare po qëndron në konsistencë duke siguruar edhe rritje. Kemi një rritje pre 3% të prodhimeve bujqësore."- tha Krifca./CNA.al