E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

PD kërkon shtyrjen e afatit për regjistrim në zgjedhje, PS kundër/ Celibashi: Nuk shkojmë përtej datës 9 mars

3 Mars 2025, 12:18, Politikë CNA

PD kërkon shtyrjen e afatit për regjistrim në zgjedhje, PS

Komisioneri shtetëror, Ilirjan Celibashi, në një konferencë për media deklaroi sot se data 9 mars mund të jetë afati i fundit për regjistrim në zgjedhje, pasi duhet shpallur lista paraprake.

Më herët, Partia Demokratike kërkoi shtyrjen e afatit për regjistrimin e diasporës, për të mos përfunduar në datën 4 mars.

Sipas Celibashit, deri më 9 mars mund të diskutohet për afate të tjera, por pa një amendim ligjor, nuk mund të ketë shtyrje përtej kësaj date të përcaktuar.

Celibashi shtoi se PS nuk ka qenë dakord me këtë kërkesë, me argumentin se data 4 është afati i njohur nga të gjithë dhe një shtyrje me 2-3 ditë nuk do të ndryshonte situatën.

"Data 9 mars është një datë që ne nuk shkojmë dot përtej saj sepse është përcaktuar nga ligji. Deri në datën 9 ne mund të flasim dhe të diskutojmë për afate të tjera, pra nuk mund të shkojmë përtej datës 9. Ka qenë një kërkesë që të shtyhet afati për ditët, për ne s’ka problem, por PS s’ka qenë dakord me këtë ide duke thënë se data 4 është e njohur për të gjithë dhe se është afati i fundit dhe shtyrja për 2 ose 3 ditë nuk do të ndryshonte ndonjë gjë të madhe",- tha Celibashi.

Komisioni Qendror i Zgjedhjeve i ka kërkuar Kuvendit dhe Ministrisë së Financave fonde shtesë prej 9. 3 milionë eurosh, për procesin e votimit të emigrantëve për zgjedhjet e përgjithshme parlamentare të 11 majit.

"Kemi pasur një diskutim me përfaqësues të Ministrisë së Financave, në parim ka një dakordë për të mbështetur buxhetin e KQZ-së për një buxhet shtesë. Në parim s'ka hezitim nga qeveria për ta mbështetur KQZ-në sa i përket këtij aspekti",- tha Celibashi.

Celibashi tha se për votën e diasporës do të ftohen vetëm posta që janë ndërkombëtare, dhe jo shqiptare.

"Nuk e ftojmë Postën Shqiptare, në tender, vetëm operatorët ndërkombëtarë që kanë përfaqësuesit e tyre në Shqipëri për të qenë pjesë e procedurës së përzgjedhjes. Negociata nis javën tjetër, nëse qeveria na jep fondet këtë javë",- tha Celibashi./CNA