web counter
LEXO PA REKLAMA!

SHKARKO APP

App Store
Google Play

E fundit!

x

Nuk hyri në parlament/ Meta refuzon mandatin e Blushit

18 Maj 2025, 14:56, Politikë CNA
Nuk hyri në parlament/ Meta refuzon mandatin e Blushit
Kreu i Partisë së Lirisë, Ilir Meta

Kreu i Partisë së Lirisë, Ilir Meta, këtë herë u bë pjesë e zgjedhjeve të vitit 2025 nga burgu, ku kandidoi në listë të hapur për Tiranën nën siglën e PD-ASHM-së dhe nuk ka marrë votat për të siguruar mandatin e deputetit.

Një skemë e shumëdiskutuar ishte që Tedi Blushi t’i jepte mandatin duke u tërhequr, por Meta e ka refuzuar këtë mandat.

Pavarësisht se nuk ka mundur të marrë votat për të siguruar një mandat për të qenë pjesë e legjislaturës së ardhshme, Meta thotë se nuk mund të pranojë asnjë marifet apo zgjidhje pragmatiste që shkon në kundërshtim me kauzat madhore për cilat ai thotë se ka luftuar dhe do luftojë gjithmonë.

“Së pari falenderoj rreth 8 mijë zgjedhës që votuan për Ilir Metaj, të cilët i rezistuan presioneve të jashtëzakonshme të Narkoshtetit dhe nuk e shitën as lirinë, as shpirtin dhe as karakterin e tyre përballë një makinerie kriminale shtetërore, që cënoi rëndë standardet e zgjedhjeve, demokracinë dhe shtetin e së drejtës në themel të tij.

Për mua ata nuk janë votues por heronj dhe do të gëzojnë përjetë të gjithë mirënjohjen time të pakufijshme.

Disa zëra dashamirës, por edhe të tjerë djallëzorë, sugjerojnë si mënyrë për marrjen e mandatit tim parlamentar, dorëheqjen e kandidatëve të Partisë së Lirisë në listën e mbyllur të Qarkut Tiranë.

Dua t'i siguroj të gjithë se Ilir Metaj që nga viti 2008, që kur u bënë ndryshimet e mbrapshta kushtetuese, ka luftuar për përfaqësim vetëm nëpërmjet vullnetit të lirë dhe të hapur të qytetarëve, në mënyrë të vazhdueshme dhe parimore, sepse kjo është çështje e bindjes dhe karakterit tim dhe si pasojë nuk mund të pranoj asnjë marifet apo zgjidhje pragmatiste që shkon në kundërshtim me kauzat madhore për cilat unë kam luftuar dhe do luftoj gjithmonë.

Dëshiroj të falenderoj dhe vlerësoj Tedi Blushi , dhe kolegët e tjerë në Partinë e Lirisë të cilët luftuan me përkushtim në këtë fushatë të pabarabartë përballë Narkoshtetit dhe makinerisë së tij zgjedhore kriminale, pabesive dhe thikave pas shpine.

Një falenderim të veçantë edhe për të gjithë ata komisionerë, numërues dhe vëzhgues, të cilët po vazhdojnë me këmbëngulje dhe përgjegjësi të lartë të numërojnë dhe të mbrojnë çdo votë deri në votën e fundit”, ka deklaruar Meta përmes një reagimi të tij në rrjetet sociale./ CNA





Lajmet e fundit nga