E fundit!

15:57 Aktualitet

VIDEO-Vrasja në Maliq, Lamallari “zbarkon” në Policinë e Korçës

Ministri i Brendshëm, Besfort Lamallari, ka zbarkuar në Dr...

“Mbështesim reformën në drejtësi”/ Rama: Opozita e sheh SPAK-un si aleat

26 Mars 2025, 11:46, Politikë CNA

“Mbështesim reformën në drejtësi”/ Rama: Opozita

Kryeministri Edi Rama u shpreh sot se Partia Socialiste është e vetmja forcë politike që garanton vijimësinë e reformës në drejtësi. Gjatë një takimi me kandidatët për deputetë, nga Shiroka, Rama tha se opozita s’do ketë asgjë në dorë, prandaj e shesh SPAK-un si të vetmen shpresë, si aleat për të bërë politikë opozitare.

Rama theksoi se shkëputja e kontrollit të drejtësisë është proces historik që PS-ja e ka mbështetur dhe do ta mbështesë deri në fund.

Rama shtoi se nuk është për të pasur dyshime dhe as dilema se kush shpërdoron fuqinë që merr nga populli.

“E rëndësishme është që të gjithë merren me ne, nuk lënë gjë pa thënë për ne. Kanë edhe paturpësi, që na tregojnë ne me gisht për punët që po bën drejtësia, na tregojnë pse edhe disa ndër ne kanë probleme me drejtësinë, ndërkohë që nëse kjo ditë erdhi, erdhi sepse e sollëm ne. Vizioni, kuraja, mbështetja jonë për institucionet e drejtësisë dhe vendosmëria që lufta kundër korrupsionit të jetë totale.

Ne dorëzuam shpatën për herë të parë që nga 1912, pushteti politik s’ka shpatën që i takonte ta kishte drejtësia dhe për herë të parë e ka drejtësia. Ne duhet të ulim kokën për këtë, përkundrazi. Përtej të gjitha lajthitjeve, në thelb ky është proces historik që e kemi mbështetur dhe do ta mbështesim deri në fund. Ata që s’do kenë asgjë në dorë, SPAK-un e shohin si të vetmen shpresë që të kapë ndonjë gjë, e shohin si aleat për të bërë politikë opozitare. Bufi thotë do ta shkrij.

Ne e kemi të qartë vijën, kush është këtu për qëllimin e përbashkët është i nderuar, kush devijon nga rruga për qëllimin e përbashkët dhe përdor fuqinë që i jep populli përmes PS-së për të bërë punë jo të ndershme pas shpinës sonë të shkojë atje ku ka vendin. Është shumë e thjeshtë, s’ka asgjë për të pasur dyshime dhe dilema",- tha Rama./CNA