web counter
LEXO PA REKLAMA!

SHKARKO APP

App Store
Google Play

“'Lepuri i Surrelit' nuk merr asnjë firmë”/ Berisha akuzon PS-në: Doni të grabisni Avokatin e Popullit

11 Dhjetor 2025, 10:39, Politikë CNA

“'Lepuri i Surrelit' nuk merr asnjë firmë”/

Kryedemokrati Sali Berisha hodhi sot akuza ndaj mazhorancës se po përpiqet të grabisë caktimin e Avokatit të Popullit, duke shkelur vendimin se ky emër i takon opozitës.

Në fjalën e tij para deputetëve në Kuvend, Berisha tha se mazhoranca është e keqja banale e kombit dhe se kandidati Endri Shabani nuk ka për të marrë asnjë firmë.

“E keqja banale e kombit jeni ju. Pse i them këto? Ky Parlament ka një Komision Ligjesh, këtë Komision Ligjesh e kryeson një ish-ministër juaji.

Në garën e Avokatit të Popullit, një ditë ky mbledh komisionin dhe vendos në mënyrë të diskutueshme, me të drejtë apo pa të drejtë, nuk mund të them, që për kandidatët për Avokat të Popullit do ketë deputeti të drejtë vetëm për një firmë.

Ky është një vendim i një komisioni, që ligji dhe Kushtetuta e ngarkon për shqyrtimin dhe për organizimin e procedurës së votimit të Avokatit të Popullit. Ai është kryetar komisioni.

Tjetër puna se e keqja banale e shndërron atë në hiç. Ne zbatuam vendimin e Komisionit të Ligjeve. Në përputhje me vendimin e Komisionit të Ligjeve, ne bëmë shkresën dhe tërhoqëm të gjitha firmat.

Dhe, thashë edhe njëherë, deputeti mund të vendosë një firmë për një kandidat, për të tjerë mund të vendosë shumë, por vendimi i Komisionit të Ligjeve ishte i qartë, nuk pranohen sepse janë vendosur firma, i njëjti deputet ka firmosur disa kandidatë.

Tani ju, meqenëse duhej patjetër që ai zoti Këlliçi e quajti 'Lepuri i Surrelit', por unë do ta quaj opozita që duam, kishte marrë firma, tani përmbysni vendimin.

Po përmbysni vendimin e Komisionit të Ligjeve, vendimin tuaj, shkelmoni mbi veten tuaj, vetëm e vetëm që të grabisni Avokatin e Popullit. Ne kemi qenë luajalë me ligjin.

Komisioni i Ligjeve vendosi që nuk mund të ketë më shumë se një të drejtë për një kandidat çdo deputet. Në respekt të saj, ne tërhoqëm firmat. Dhe ju vazhdoni tani, sepse ju e dini se 'Lepuri i Surrelit' nuk merr dot asnjë firmë. Jo, nuk i merr dot. Dhe shikoni se ç’bëni, i bëni edhe atij kukumalen në qafë për të realizuar një akt të turpshëm. Bëjeni, por është një gjë shumë e ulët,-tha Berisha./CNA





Lajmet e fundit nga