A mund të veshim të njëjtën palë çorape të nesërmen?/ Përgjigjet e shkencës

4 Janar 2026, 14:57, Lifestyle CNA

A mund të veshim të njëjtën palë çorape të

Të veshësh të njëjtën palë xhinse ose një triko për herë të dytë, pa i larë, konsiderohet krejtësisht normale. Edhe një bluzë me mëngë të shkurtra mund të vishet për më shumë se një ditë. Po çorapet? Këtu ndryshojnë gjërat. Nëse do ta dinit se çfarë ndodh vërtet brenda çorapeve tuaja vetëm pas një dite përdorimi, mund t'i shihnit ato me një "sy" tjetër.

Këmbët tona janë shtëpia e një “pylli tropikal” të vogël bakteresh dhe kërpudhash deri në 1,000 lloje të ndryshme. Këmba është shtëpia e një larmie veçanërisht të gjerë kërpudhash krahasuar me pjesët e tjera të trupit dhe gjithashtu ka një numër të lartë gjëndrash djerse.

Shumica e baktereve dhe kërpudhave preferojnë të jetojnë në hapësirat e ngrohta dhe me lagështi midis gishtërinjve të këmbëve, ku ushqehen me djersë dhe qeliza të vdekura të lëkurës. Nënproduktet e këtij procesi janë përgjegjëse për aromat e pakëndshme që zhvillohen në këmbë, çorape dhe këpucë.

Sa më shumë që djersiten këmbët, aq më shumë “ushqim” kanë bakteret dhe aq më e fortë bëhet aroma.

Çorapet bllokojnë djersën dhe bëhen një mjedis ideal për rritjen e mikroorganizmave. Dhe ja ku vjen fakti më pak i njohur, por më shqetësues: Bakteret mund të mbijetojnë në pëlhurë për muaj të tërë. Në pambuk, për shembull, deri në 90 ditë.

Studimet tregojnë se çorapet e veshura vetëm një herë përmbajnë miliona baktere, shumë më tepër sesa artikujt e tjerë të veshjeve, siç janë bluzat. Këto përfshijnë si mikroorganizma të padëmshëm të lëkurës ashtu edhe kërpudha potencialisht patogjene, të tilla si Candida dhe Aspergillus.

Dhe nuk mbaron me kaq. Çfarëdo që “jeton” në çorapet tuaja mund të transferohet lehtësisht në këpucët tuaja, në dysheme, në divan apo edhe në shtrat. Kjo është arsyeja pse infeksionet mund të përhapen lehtë, veçanërisht nëse çorapet ripërdoren ose nëse ecni zbathur në hapësira publike.

Çfarë mund të bëni?

Higjiena e duhur e këmbëve luan një rol të rëndësishëm:

Shmangni çorapet dhe këpucët që shkaktojnë djersitje të tepërt.

Lani këmbët rregullisht

Lërini këpucët të "pushojnë" në mënyrë që të thahen plotësisht.

Ekzistojnë gjithashtu çorape antimikrobik , me fibra si argjendi ose zinku, që kufizojnë rritjen e baktereve, si dhe çorape bambuje që lejojnë ventilim më të mirë. Këto mund të zgjasin pak më shumë.

Për shumicën e çorapeve klasike (pambuku, leshi ose sintetike), rekomandimi është i qartë: përdoreni një herë dhe pastaj lajini

Sa i përket larjes, temperaturat e ulëta janë të mjaftueshme vetëm për përdorim të lehtë të përditshëm. Për dezinfektim efektiv, nevojitet larja në 60°C ose përdorimi i një detergjenti enzimatik. Dhe nëse gjithçka tjetër dështon, një hekur me avull bën mrekulli./Ygeia Mou