E fundit!

08:42 Politikë

Mblidhet sot Këshilli Kombëtar i PD-së/ Pritet zgjedhja e Sekretarit të Përgjithshëm, nënkryetarëve dhe strukturave

Partia Demokratike vijon procesin e riorganizimit të brend...

Shtohen denoncimet për dhunë në familje në Gjirokastër/ Psikologia: Është rritur ndërgjegjësimi

10 Dhjetor 2024, 10:03, Kronika CNA

Shtohen denoncimet për dhunë në familje në Gjirokastër/

Foto ilustruese

Shtohen rastet e dhunës në familje në Qarkun e Gjirokastrës. Vetëm për vitin aktual që po flasim, ka një shtim të denoncimit të rasteve të dhunës në familje.

Kjo konfirmohet edhe prej statistikave të Policisë Vendore të Qarkut të Gjirokastrës. Por ajo që përbën rast të rrallë në këto muaj të këtij viti, është se për herë të parë kemi një reagim nga meshkujt e dhunuar që guxojnë për të denoncuar rastet e dhunës ndaj tyre prej ish-bashkëshorteve. Deri më tani janë disa raste që ish-bashkëshortët kanë kërkuar urdhër-mbrojtjeje prej Gjykatës së Shkallës së Parë në Gjirokastër, pasi janë ndier të rrezikuar dhe të ekspozuar ndaj dhunës që kanë ushtruar ish-gratë e tyre.

Urdhrat e mbrojtjes janë dhënë menjëherë brenda 24 orëve nga ana e kësaj gjykate për të ndalur në këtë mënyrë dhe ekseset fizike. Kjo në fakt mbron më shumë meshkujt që janë ndier të rrezikuar nga furia e grave që sipas psikologes Loreta Mamani, herë pas here abuzojnë dhe me të drejtat që kanë përfituar nga ligjet në fuqi.

Psikologia Loreta Mamani

Sipas psikologes gjirokastrite, ka rritje të rasteve të dhunës në familje në Qarkun e Gjirokastrës, por vlerësohet që kjo dhunë është përshkallëzuar edhe më, por moskallëzimi i kësaj dhune është në nivele të frikshme. Kjo pasi të dhunuarat, kryesisht gratë, fëmijët, të moshuarit, gjykojnë që këto eksese familjare, t’i mbajnë të kyçura brenda katër mureve të shtëpisë.

"Sipas statistikave në vitin 2023 kanë qenë gjithsej 736 raste të dhunës në familje, kurse për vitin 2024 ende nuk ka statistika, edhe pse ka pasur edhe në Gjirokastër raste të dhunës, por ajo denoncohet, themi ne, kur nuk mban më ujë pilafi. Sepse zakonisht dhuna mbetet brenda 4 mureve të shtëpisë dhe nuk denoncohet.

Ka pasur raste edhe kur çështja ka vazhduar në gjykatë dhe kanë marrë urdhër-mbrojtjeje nëna dhe fëmija për dhunën që ka ushtruar babi ndaj tyre, ka pasur raste kur janë penduar fëmija dhe nëna në këto raste pavarsisht se janë penduar ligjet janë të caktuara që dhunuesi të marrë dënimin që i takon.

Drejtoria e Policisë Gjirokastër

Nga viti në vit ne shohim që ka denoncime, më shumë kjo tregon që njerëzit janë ndërgjegjësuar, por përsëri unë them që mbetet brenda mureve të shtëpisë sepse nuk duan të prishin familjen, nuk duan të turpërohen, pra, ka disa arsye të cilat nuk denoncojnë", ka thënë Mamani.

Sipas të dhënave që CNA ka siguruar zyrtarisht, bëhet e ditur se prej janarit të këtij viti janë plotësuar 53 kërkesë-padi, referuar 21 raste për dhunë në familje, ndërkohë që janë proceduar në gjendje të lirë 12 persona, arrestuar shtatë dhe në kërkim dy të tjerë.

Shqetësim ngelet vala në rritje e dhunës brenda në familjet gjirokastrite, të cilat në shumicën e rasteve ngelen raste të padenoncuara dhe kjo e ka një shpjegim si pasojë e kulturës patriarkale që mbizotëron në shumicën e familjeve të zonës përreth./ CNA