web counter
LEXO PA REKLAMA!

SHKARKO APP

App Store
Google Play

E fundit!

x

Peleshi: Kemi disa variante për Reformën Administrative-Territoriale, të vijojë bashkëpunimi mbipartiak

29 Mars 2026, 11:51, Kronika CNA

Kryeparlamentari dhe drejtuesi politik i Qarkut të Korçës Niko Peleshi, ndau sot disa qëndrime me rëndësi sa i takon Reformës Administrative- Territoriale.

Në një deklaratë të bërë këtë të shtuna gjatë një vizite në Maliq, Peleshi theksoi se ka disa variante dhe propozime, me avantazhet dhe disavantazhet e veta.

Për Peleshin, me rëndësi mbetet bashkëpunimi mbipartiak i arritur deri më tani, që synon të çojë në arritjen e një produkti të përbashkët.  

"Është e vërtetë që është krijuar komisioni për Reformën Administrative-Territoriale. Lajmi i mirë është që deri tani kemi një bashkëpunim mbipartiak dhe shpresoj që edhe produkti final të jetë një produkt i përbashkët, pra të ketë dakordësi në të dyja forcat politike, sepse kjo do e bënte reformën më të qëndrueshme. Nëse i referoheni varianteve që besoj kanë rrjedhur në media nga diskutimet e djeshme të grupit parlamentar të PS, ku janë prezantuar disa mendime, propozime dhe variante nga anëtarët e PS në këtë komision, unë nuk mund të nxitoj të jap një vlerësim. Natyrisht ka avantazhe dhe disavantazhe, por secili variant që kemi dëgjuar deri tani, por edhe variantet që mund të paraqiten në komision nga anëtarë të tjerë që nuk janë pjesë e grupit të Partisë Socialiste, duhet të shqyrtohen me kujdes. E rëndësishme është që produkti final duhet të orientohet nga nevoja për të rritur eficiencën e bashkive tona. Ka mënyra të ndryshme se si kjo arrihet, përmes harmonizimit të zonave rurale me zonat urbane. Një gjë e mirë e reformës së vitit 2015 është që për herë të parë patëm bashki që janë edhe rurale edhe urbane.

Për shembull, në qarkun e Korçës kemi fushën e dytë më të madhe bujqësore në Shqipëri. Me formulën para vitit 2015, me bashki urbane dhe komuna rurale, nuk mund ta shfrytëzonim këtë potencial. Bëmë një hap shumë të madh me bashkitë e ndërthurura urbane dhe rurale dhe kjo duhet pasur parasysh për të gjithë vendin, veçanërisht për qarkun tonë përsa i përket zonës së bujqësisë, që formula të jetë e tillë që çliron sa më shumë potencial dhe mundësi.

Unë mendoj që qarqet tona, bashkitë tona periferike, pra jo metropolitane, sot janë në një moment shumë të rëndësishëm reflektimi për shkak të tendencës së lëvizjeve migratore brenda vendit. Gjithmonë ka një tërheqje drejt metropolit. Nuk është vetëm në Shqipëri, është një fenomen ndërkombëtar dhe i takon bashkive dhe pushtetit vendor të gjejnë formulën se si të zhvillojnë potencialet e veta, në mënyrë që të mbajnë popullsinë të lidhur me territorin",-tha Peleshi. 

I pyetur nëse ekziston rreziku për nnjë reformë që orientohet drejt riorganizimit të votave që i jep avantazh PS-së, Peleshi u shpreh se ky element nuk duhet të jetë faktor politik në mënyrë absolute.

"Absolutisht që nuk duhet të jetë në tavolinë ky faktor, faktori politik. Unë nuk jam dakord që ky faktor ka qenë edhe në reformën e viteve 2014-2015. Madje jam dëshmitar i asaj kohe: nuk ka pasur një faktor të tillë dhe asnjë formulë politike që ka orientuar reformën, përveçse eficienca. Besoj që ishte një hap shumë i mirë përpara, një hap cilësor drejt arkitekturës së re të bashkive tona, por siç e thashë, ka gjithmonë dinamikë dhe ndaj ka ardhur koha për një reformë të re. Uroj shumë dhe do të luaj edhe rolin që më takon si kryetar i Kuvendit për të mundësuar një klimë sa më pozitive. Ndonëse jo gjithmonë është e lehtë, është një nga sfidat më të mëdha të atij pozicioni që të kemi një formulë bipartizane. Kjo do të shuante edhe paragjykimet për një reformë të frymëzuar politikisht",-tha Peleshi./CNA





Lajmet e fundit nga