E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

I qethur e i shëndoshur, në plazhin e Himarës/ Si u arrestua bosi turk i kriptmonedhave

30 Gusht 2022, 12:38, Kronika CNA

I qethur e i shëndoshur, në plazhin e Himarës/ Si u

I arratisur nga Turqia me 2 miliardë dollarë që ua vodhi punonjësve të kompanisë së tij, Drejtori i Përgjithshëm i "Thodex" Fatih Özer, është kapur në qytetin e Himarës si rezultat i operacionit të kryer nga Drejtoria Vendore e Policisë Elbasan, në bashkëpunim me FAST Albania dhe DVP Vlorë, nën drejtimin e Prokurorisë pranë Gjykatës së Rrethit Gjyqësor Elbasan.

28-vjeçari nga Turqia, Fatih Ozer, ishte shpallur në kërkim ndërkombëtar për veprat penale “Krijimi i organizatës kriminale” dhe "Mashtrimi me pasoja të rënda”.

Pas arrestimit të tij, Ministri i Punëve të Brendshme i Republikës së Shqipërisë, Bledi Çuçi, ka njoftuar homologun e tij turk, Süleyman Soylu se themeluesi i "Thodex", i arratisuri Faruk Fatih Özer, i cili ishte në kërkim me njoftim të kuq, dhe është kapur në Himarë dhe identiteti i tij u konfirmua nga rezultatet biometrike.

Fatih Özer i cili u kap në plazhin e Himarës, bashkë me dy shtetas të tjerë, kishte ndryshuar pamje, ishte qethur dhe shëndoshur.

Njoftimi i Policisë:

Në vijim të punës për kapjen e personave të shpallur në kërkim kombëtar dhe ndërkombëtar, pas shumë kërkimesh në disa qarqe të vendit, bazuar edhe në informacionet e marra në rrugë operative për vendndodhjen e një personi shumë të kërkuar nga drejtësia turke, si dhe falë përdorimit të metodave proaktive nga DVP Elbasan, në bashkëpunim me Prokurorinë e Rrethit Gjyqësor Elbasan, u organizua dhe u finalizua operacioni policor i koduar “Brain”.

Në kuadër të këtij operacioni u bë kapja dhe ndalimi i shtetasit turk F. O., 28 vjeç.

Ky shtetas u kap në Himarë, si rezultat i operacionit policor të koduar “Brain”, pasi ishte shpallur në kërkim ndërkombëtar nga Interpol Ankara. Gjykata e Lartë e Stambollit ka lëshuar urdhër arresti në vitin 2021, ndaj 28-vjeçarit, per veprat penale “Krijimi i organizatës kriminale” dhe "Mashtrimi me pasoja të rënda”.

Gjatë operacionit, bashkë me shtetasin e shumëkërkuar, u shoqëruan dhe 2 shtetas te tjerë, B. Sh., 36 vjeç, banues ne Tiranë dhe E. H., 37 vjeç, banues ne Durrës, të cilët janë shoqëruar për veprime të mëtejshme, për të sqaruar pozitën e tyre procedurale në raport me personin e shpallur në kërkim ndërkombëtar.

Në cilësinë e provës materiale janë sekuestruar laptopë, aparate celulare, karta bankash etj./CNA.al