E fundit!

10:38 Kulturë

Ndahet nga jeta mjeshtri i humorit, Todi Llupi

Ndahet nga jeta në moshën 78-vjeçare mjeshtri i humorit To...

Atentati në Lezhë për hakmarrje?/ I afërmi i viktimës: Të hetohen dhe pista të tjera

26 Prill 2026, 22:16, Kronika CNA

Atentati në Lezhë për hakmarrje?/ I afërmi i viktimës:

Një atentat me armë zjarri tronditi ditën e sotme Lezhën, ku viktima mbetën një çift bashkëshortësh. Lidhur me ngjarjen, ka reaguar Gjergj Neli, i afërm i 39-vjeçarit, Kreshnik Mujecit që mbeti i vrarë.

Në një postim në Facebook, Neli shprehet se kërkon nga organet ligjzbatuese zbardhjen e plotë dhe të shpejtë të ngjarjes, si dhe vënien para përgjegjësisë të autorëve.

Gjithashtu më tej në reagimin e tij shprehet se hetuesit nuk duhet të hetojnë vetëm pistën e hakmarrjes por edhe pista të tjera të dyshimta për zbardhjen e ngjarjes së rëndë kriminale.

Ai shton se Mujeci nuk është gjetur fajtor në lidhje me ngjarjen e ndodhur në 2017 në Malin e Jushit dhe nuk ka arsye që ajo të lidhet me atentatin e sotëm.

Deklarata e plotë:

Për ngjarjen e rëndë dhe makabre të atentatit ndaj Kreshnik Mujecit me familje

Me mallëngjim dhe me keqardhje morëm vesh njoftimin e hidhur në lidhje me ngjarjen e rëndë të një atentati të ndodhur sot në fshatin Balldren, Njësia Administrative Balldren, Bashkia Lezhë, ku humbën jetën tragjikisht shtetasit Kreshnik Mujeci dhe Gentjana Mujeci. Ndaj, për këtë atentat makabër, shprehim dhimbjen e thellë dhe solidaritetin me familjarët e viktimave në këtë moment të vështirë.

Dënojmë me forcë këtë akt të rëndë kriminal dhe kërkojmë nga organet ligjzbatuese zbardhjen e plotë dhe të shpejtë të ngjarjes, si dhe vënien përpara përgjegjësisë të autorëve.

Njëkohësisht, dënojmë publikisht deklarimet e disa mediave, të cilat kanë aluduar se kjo ngjarje lidhet kryesisht me motive hakmarrjeje, meqenëse gjaku dhe fisi i Mujeçëve nuk u kanë asnjë detyrim. Versione të kësaj natyre edhe mund të jenë një nga pistat e dyshuara për organet ligjzbatuese, por këshillojmë moslënien në harresë edhe të pistave të tjera të dyshimta për ngjarjen kriminale të ndodhur.

Kreshnik Mujeci ka qenë një familjar i rregullt, i dashur dhe i respektuar me të afërmit dhe me të gjithë komunitetin përreth Lezhës dhe Shkodrës, i cili merrej me blegtori së bashku me bashkëshorten e ndjerë për të përballuar jetesën normale në shërbim të familjes.

Këto pretendime janë të pavërteta dhe të pabazuara përtej çdo dyshimi në lidhje me ngjarjen e vitit 2017 në Malin e Jushit, për të cilën është trajtuar dhe ezauruar nga organet kompetente, përkatësisht Prokuroria e Shkodrës, si dhe nga Gjykata e Shkallës së Parë dhe Gjykata e Apelit Shkodër.

Në përfundim të këtyre proceseve, shtetasi Kreshnik Mujeci nuk është gjetur fajtor në lidhje me atë ngjarje. Për rrjedhojë, çdo përpjekje për ta lidhur ngjarjen e sotme me pretendime të tilla është e papranueshme dhe cenon të vërtetën, si dhe rëndon padrejtësisht mbi familjen e viktimave.

U bëjmë thirrje mediave të tregojnë përgjegjësi profesionale, të verifikojnë informacionin dhe të shmangin përhapjen e lajmeve të pasakta që mund të ndikojnë negativisht në opinionin publik dhe në dinjitetin e familjeve që presupozohen të përfshira në konflikt.

Për këtë, kërkojmë drejtësi dhe zbardhjen e ngjarjes, transparencë të plotë për këtë ngjarje makabre dhe të rëndë.

Zoti forcoftë familjarët dhe gjithë miqësinë kudo që të jenë.

Lamtumirë kushëriri jem!

Lamtumirë kunatë!

Pushofshi në paqen e Zotit! /CNA