E fundit!

16:38 Ekonomi

BSH mban të pandryshuar normën bazë të interesit në 2.5%/ Inflacioni shënon rritje gjatë tremujorit të dytë të vitit

Guvernatori i Bankës së Shqipërisë, Gent Sejko, në një kon...

Problemet me konstituimin në Kosovë/ Komisionerja Kos: Të formohen institucionet sa më shpejt të jetë e mundur

7 Maj 2025, 13:39, Kosova & Bota CNA

Problemet me konstituimin në Kosovë/ Komisionerja Kos: Të

Komisioni Europian, përmes Komisioneres për Zgjerim, Marta Kos, ka deklaruar se është në interes të Kosovës që të formojë institucionet e saj sa më shpejt të jetë e mundur. Kos e tha këtë në një debat në Parlamentin Europian kushtuar raportit për Kosovën. Ky raport, i përgatitur nga raportuesi Riho Terras, pritet të votohet sot gjatë seancës plenare të Parlamentit Europian.

“Është në interes të Kosovës të formojë institucionet e saj sa më shpejt të jetë e mundur për të çuar përpara reformat urgjente evropiane. Kjo do të mundësonte lirimin e fondeve nga ky instrument, me kusht që të përmbushen të gjitha kriteret e tjera",-tha Kos.

Kos theksoi gjithashtu nënshkrimin dhe ratifikimin e marrëveshjeve që lidhen me Planin e Rritjes, i cili, sipas saj, do të duhet të trajtohet si prioritet nga qeveria dhe Parlamenti i ri.

Ajo gjithashtu përsëriti nevojën që Kosova të përmbushë detyrimet e saj sipas Marrëveshjes së Ohrit pa vonesë në kuadër të dialogut me Serbinë.

Lidhur me aplikimin e Kosovës për anëtarësim në BE, Komisioneri Kos deklaroi se Komisioni është gati të fillojë punën për hartimin e një opinioni mbi aplikimin e Kosovës sapo të marrë një mandat për ta bërë këtë nga Këshilli i BE-së.

Ndërkohë, raporti i Parlamentit Europian, i cili më parë ishte miratuar nga Komiteti i Politikës së Jashtme, mirëpret kërkesën e Kosovës për anëtarësim në BE dhe u bën thirrje vendeve anëtare të fillojnë punën për shqyrtimin e kësaj kërkese. Parlamenti Evropian u bën thirrje gjithashtu 5 vendeve të BE-së që nuk e kanë njohur Kosovën ta bëjnë këtë sa më shpejt të jetë e mundur.

Lidhur me dialogun midis Kosovës dhe Serbisë, si në raport me njërin ashtu edhe me tjetrin shtet, Parlamenti Europian bën thirrje për angazhim të sinqertë për normalizimin gjithëpërfshirës të marrëdhënieve përmes një marrëveshjeje ligjërisht të detyrueshme të bazuar në njohjen reciproke./CNA