web counter
LEXO PA REKLAMA!

SHKARKO APP

App Store
Google Play

Nga Stoltenberg , Borrell tek Michel/ Liderët e Europës mesazhe ngushëllimi: Solidaritet për popullin turk

6 Shkurt 2023, 11:35, Kosova & Bota CNA
Nga Stoltenberg , Borrell tek Michel/ Liderët e Europës mesazhe
Foto ilustruese

Liderët e Europës kanë dërguar mesazhe solidariteti dhe ngushëllimet pas tërmetit të fuqishëm me magnitudë 7.8 ballë që goditi Turqinë mëngjesin e sotëm, duke vrarë të paktën 912 persona në Turqi dhe Siri.

Sekretari i Përgjithshëm i NATO-s Jens Stoltenberg tha se aleanca është në solidaritet të plotë me Turqinë.

"Solidaritet i plotë me aleatin tonë Turqinë pas këtij tërmeti të tmerrshëm. Unë jam në kontakt me Presidentin Erdogan dhe ministrin e Jashtëm Mevlut Cavusoglu dhe aleatët e NATO-s po mobilizojnë mbështetjen," tha ai në një postim në Twitter.

Kryediplomati i Bashkimit Evropian, Josep Borrell , tha se blloku është gati të ndihmojë Turqinë, pas tërmetit.

"Një tërmet shkatërrues tronditi Turqinë dhe Sirinë këtë mëngjes, duke marrë jetën e qindra njerëzve dhe duke plagosur shumë të tjerë. Mendimet tona janë me popullin e Turqisë dhe Sirisë. BE-ja është e gatshme të ndihmojë," tha Borrell.

Presidenti i Këshillit Evropian Charles Michel ka dërguar ngushëllimet për familjet e  viktimave.

"Me pikëllim të thellë dëgjova këtë mëngjes për tërmetin shkatërrues që goditi pjesë të Turqisë dhe Sirisë. Ngushëllimet e mia më të thella për shumë familjarë që humbën të dashurit e tyre dhe iu uroj një shërim të shpejtë të të plagosurve. BE qëndron në solidaritet të plotë me ju," shkroi ai në Twitter të hënën. 

Presidentja e Komisionit të BE-së Ursula von der Leyen tha se mbështetja nga Evropa është rrugës.

"Ne qëndrojmë në solidaritet të plotë me popullin e Turqisë dhe Sirisë pas tërmetit vdekjeprurës. Ne jemi pranë me familjet e viktimave. Mbështetja e Evropës është rrugës dhe ne jemi të gatshëm të vazhdojmë të ndihmojmë në çdo mënyrë që mundemi. ”, tha ajo në një postim në Twitter./ CNA.al

 





Lajmet e fundit nga