web counter
LEXO PA REKLAMA!

SHKARKO APP

App Store
Google Play

Merz: Gjermania duhet ta bojkotojë Eurovisionin nëse Izraeli përjashtohet

6 Tetor 2025, 10:22, Kosova & Bota CNA

Merz: Gjermania duhet ta bojkotojë Eurovisionin nëse Izraeli

Kancelari gjerman, Friedrich Merz, ka thënë se Gjermania duhet të tërhiqet nga gara vjetore e këngës, Eurovision, vitin e ardhshëm në Vjenë, nëse Izraeli përjashtohet.

I pyetur në një intervistë për transmetuesin publik ARD të dielën, nëse Gjermania duhet të heqë dorë vullnetarisht nga pjesëmarrja në atë rast, Merz tha:

“Do ta mbështesja këtë. Mendoj se është skandal që kjo madje po diskutohet. Izraeli e ka vendin atje”.

Spektakli muzikor përfshin vende nga Europa, por edhe më gjerë, ku secili shtet paraqet një këngë për të garuar për titullin, i cili ndahet pas vlerësimit nga juria kombëtare dhe nga votimi publik.

Trysnia ndaj organizatorëve të festivalit është rritur në javët e fundit, pasi disa transmetues, përfshirë ata nga Spanja, Irlanda dhe Holanda, kanë kërcënuar se do të tërhiqen nëse Izraelit nuk i ndalohet pjesëmarrja, për shkak të luftës në Rripin e Gazës.

Transmetuesit kombëtarë luajnë rol vendimtar në Eurovision, pasi ata janë përfaqësuesit zyrtarë të vendeve të tyre në Unionin Europian të Transmetimeve (EBU).

EBU-ja është përgjegjëse për përzgjedhjen e këngëve pjesëmarrëse, bashkërendimin e transmetimeve direkte dhe mbikëqyrjen e procedurave të votimit.

EBU-ja njoftoi në fund të muajit të kaluar se do ta zhvillojë një takim online me të gjithë transmetuesit anëtarë në nëntor për të votuar mbi pjesëmarrjen në garën e vitit 2026.

Eurovisioni i ardhshëm është planifikuar të mbahet në Vjenë në maj 2026.

Protesta të mëdha publike kundër pjesëmarrjes së Izraelit në Eurovision janë mbajtur në dy edicionet e fundit./REL





Lajmet e fundit nga