E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Media italiane: Vuçiç rrezik për Ballkanin, do shpallë “Jugosllavinë” e re në maj

2 Prill 2024, 20:05, Kosova & Bota CNA

Media italiane: Vuçiç rrezik për Ballkanin, do shpallë

Aleksandër Vuçiç

Mesazhi i presidentit serb, Aleksandër Vuçiç, që fliste për kohë të vështira për popullin e Serbisë, por zotohej ndërkohë edhe të luftonte për fitore, është parë me shqetësim nga media italiane “Europa Today”.

“Jo vetëm në Kosovë, por në gjithë Ballkanin po fryjnë erëra të rrezikshme”, shkruan media italiane, nisur nga “kërcënime ekzistenciale” ndaj vendit të tij të përmendura nga Vuçiç.

Sipas autores, Alessia Capasso, ndër datat për t’u ndjekur me vëmendje të madhe për fatin e rajonit përmend 5 dhe 6 majin, ku do të mbahet “Asambleja e Madhe e Pashkëve”, ku siç ka thënë presidenti i Republikës Serbe, Milorad Dodik, “do të merren vendime të rëndësishme për mbijetesën e popullit serb”.

“Si rezultat, mesazhet shqetësuese të Vuçiçit, shtyjnë para hipotezën që në ato data mund të ndodhë njoftimi për bashkim mes Serbisë dhe Republika Serbe. Atëherë plagët e pashëruara asnjëherë në vendet e ish-Jugosllavisë do të rihapeshin sërish”, nënvizon në shkrim gazetarja italiane, ku jep alarmin se nëse kjo do të ndodhë apo shkohet drejt diçkaje konkrete, në Ballkan mund të rikthehet konflikti.

Artikulli përmend edhe për tensionet e vazhdueshme mes Serbisë dhe Kosovës, të shtuara nga vendimi për dinarin, por edhe për avancimin e vendit drejt anëtarësimit në Këshillin e Evropës.

Më shqetësuese megjithatë konsiderohet dëshira e Dodik-ut për ta ndarë Republikën Serbe nga Bosnja. Kohët e fundit, politikani i sanksionuar nga ShBA-ja, njoftoi se do të organizojë një referendum për statusin e territorit.

“Lamtumirë Bosnje, bëhuni gati për Republika Serbe exit”, shkroi Dodik në gjuhën angleze, pas një takimi me Vuçiç, në një mesazh drejtuar ndërkombëtarëve.

Bashkimi Evropian hapi negociatat e anëtarësimit për të frenuar idetë separatiste në Bosnje dhe Hercegovinë, por Dodik nuk e pa me sy të mirë këtë vendim.

Media italiane nënvizon më tej se edhe presidenti rus Vladimir Putin e mbështet idenë për bashkimin e Republikës Serbe me Serbinë./ CNA