E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Ligjvënësit amerikanë hetojnë shkaqet e tërheqjes kaotike nga Afganistani

21 Prill 2023, 17:31, Kosova & Bota CNA

Ligjvënësit amerikanë hetojnë shkaqet e tërheqjes

Një raport i administratës së Presidentit Biden arriti në përfundimin se tërheqja kaotike e Shteteve të Bashkuara nga Afganistani në gusht 2021, ishte kryesisht si rezultat i vendimeve të marra nga administrata e ish-Presidentit Trump. Korrespondentja e Zërit të Amerikës Katherine Gypson bisedoi me anëtarët e Komisionit të Marrëdhënieve me Jashtë të Dhomës së Përfaqësuesve për hapat që ata synojnë të ndërmarrin në vazhdim.

Mbi një vit e gjysëm që nga tërheqja e Shteteve të Bashkuara nga Afganistani, një raport i ri i administratës së Presidentit Biden arrin në përfundimin se vendimet e marra nga ish-Presidenti Donald Trump krijuan kushtet për dështimin e Shteteve të Bashkuara.

“Administrata e fundit u angazhua jo vetëm për largimin e të gjitha forcave amerikane, por edhe për lirimin e mijëra, dhjetëra mijëra luftëtarëve nga burgu, si dhe për afate kohore, që iu lanë administratës Biden. Presidenti bëri gjithçka të mundur për ta mbajtur nën kontroll situatën”, tha Ligjvënësi demokrat David Cicilline.

Por, ligjvënësit republikanë thonë se Presidenti Biden është në fund të fundit përgjegjës si kreu i qeverisë. Ligjvënësi Chris Smith i tha Zërit të Amerikës se ka qenë i zemëruar nga mungesa e përgjegjshmërisë...

“Nuk më besohet që administrata ia kaloi fajin Trampit. Siç e dini, ai e kishte shoqëruar me kushte, se kur, apo nëse forcat tona do të largoheshin nga Afganistanit dhe ky është çelësi, ky është thelbi i gjithçkaje, se pati kushtëzim. Bideni nuk pati asnjë kushtëzim, njoftoi paraprakisht se dëshironte pamje të llojit të 11 shtatorit”, thotë Ligjvënësi republikan Chris Smith.

Kryetari i Komisionit të Marrëdhënieve me Jashtë të Dhomës së Përfaqësuesve, Michael McCaul i tha Zërit të Amerikës se administrata e Presidentit Biden vazhdon të mos i dorëzojë komunikimet gjatë të cilave pati mendime të kundërta nga ambasada amerikane në Kabul.

“Kongresi ka të drejtën të njihet me përmbajtjen, dhe kjo është gjithë çfarë kemi kërkuar nga Sekretari (i Shtetit). Le t’i retushojnë emrat; do të njihemi me dokumentat në një mjedis për informacionet e klasifikuara. Por, unë dua ta shoh përmbajtjen e tyre. Nuk dua ta marr të filtruar nga punonjësit tuaj”, thotë Kryetari McCaul.

Zyrtarët e qeverisë u thanë ligjvënësve këtë javë se faji mund të gjendet në të dyja administratat, duke filluar që nga pasojat e shkaktuara nga marrëveshja e Dohas e vitit 2020, e negociuar nga ish-Presidenti Trump.

“Këto vendime degraduan në mënyrë dramatike moralin e forcave afgane të sigurisë dhe krijuan një varësi totale në luftime të ushtrisë afgane tek kontraktorët dhe forcat amerikane, duke e lënë kështu ushtrinë afgane të paaftë për të zhvilluar operacione”, thotë John Sopko, Inspektor i Përgjithshëm për Rindërtimin e Afganistanit.

Po kështu edhe për sa i përket planifikimit nga Departamenti i Shtetit...

“Arritëm në përfundimin se drejtuesit e ambasadës, duke zbatuar vendimin e marrë në atë kohë nga administrata, vepruan me mirëkuptimin se operacionet diplomatike do të vazhdonin në Afganistan pas tërheqjes së forcave ushtarake dhe nuk donin të angazhoheshin haptazi në planifikimin e evakuimit, për shkak të shqetësimeve se mund të ngjallte panik dhe të dëmtonte mbështetjen për qeverinë afgane”, tha Inspektorja e Përgjithshme në detyrë, Diana Shaw.

Ligjvënësi McCaul thotë se Kongresi do ta vazhdojë hetimet për sulmin vetëvrasës me bombë më 26 gusht 2021, në aeroportin e Kabulit.

“Kush ishte komandanti që nuk dha leje për të goditur autorin e sulmit vetëvrasës, që rezultoi me vdekjen e 13 burrave dhe grave ushtarake?”, tha Kryetari McCaul.

Sulmi me bombë vrau edhe 170 civilë afganë./ VOA