web counter
LEXO PA REKLAMA!

SHKARKO APP

App Store
Google Play

Kryeministri i ri i Sirisë u bën thirrje refugjatëve sirianë të kthehen

11 Dhjetor 2024, 14:38, Kosova & Bota CNA

Kryeministri i ri i Sirisë u bën thirrje refugjatëve sirianë

Kryeministri i ri i Sirisë u bëri thirrje sirianëve që kanë kërkuar strehim jashtë vendit, të kthehen në Siri, pas përmbysjes së presidentit Bashar al-Assad.

Mohammad al-Bashir, i emëruar nga grupet rebele si udhëheqës i qeverisë kalimtare, i tha së përditshmes italiane, "Corriere della Sera", se një nga synimet e tij të para është “kthimi i miliona refugjatëve sirianë që ndodhen jashtë vendit”.

“Kapitali i tyre njerëzor, përvoja e tyre do t’i mundësojë vendit të lulëzojë”, tha Bashir në intervistën e publikuar të mërkurën.

“Kam një thirrje për të gjithë sirianët jashtë vendit: Siria është tani një vend i lirë që ka fituar krenarinë dhe dinjitetin e saj. Kthehuni! Ne duhet ta rindërtojmë, të rilindim dhe kemi nevojë për ndihmën e të gjithëve”, tha ai.

Regjimi i Assadit në Siri ra më 8 dhjetor, kur pushtetin e mori organizata Hayat Tahrir al-Sham (HTS) - e shpallur terroriste nga SHBA-ja - dhe aleatë të saj.

Lufta civile gati 14-vjeçare në këtë vend la të vrarë 500.000 njerëz dhe detyroi gjysmën e banorëve të largoheshin nga shtëpitë e tyre - miliona prej të cilëve gjetën strehim jashtë vendit.

Pas largimit të Assadit, Siria përballet me pasiguri të mëdha.

Shqetësime ka sidomos për dhunën sektare, edhe pse HTS-ja ka bërë përpjekje t’i sigurojë pakicat fetare se do të jenë të sigurta në Sirinë e re.

Komunitetet e ndryshme të vendit, përfshirë të krishterët, kurdët dhe alavitët, presin tani të shohin se çfarë qeverie do të udhëheqë Bashiri.

Kreu i Kishës Katolike, Papa Françesku, bëri thirrje të mërkurën për “respekt të ndërsjellë” midis feve në Siri./ Rel 





Lajmet e fundit nga