web counter
LEXO PA REKLAMA!

SHKARKO APP

App Store
Google Play

E fundit!

x

Bislimi: Serbia po tenton ta ndalë ndihmën e Kosovës për bujqit shqiptarë në Luginë

10 Dhjetor 2024, 19:14, Kosova & Bota CNA
Bislimi: Serbia po tenton ta ndalë ndihmën e Kosovës për
Zëvendëskryeministri i Kosovës, Besnik Bislimi.

Zëvendëskryeministri i Kosovës, Besnik Bislimi, e ka akuzuar Serbinë se po përpiqet ta ndalë mbështetjen financiare të Qeverisë së Kosovës për bujqit shqiptarë në Luginën e Preshevës.

“Qeveria e Republikës së Kosovës dënon ashpër përpjekjet e autoriteteve serbe për të ndaluar donacionin e dedikuar për subvencionimin e bujqve shqiptarë në Preshevë, Bujanoc dhe Medvegjë”, tha Bislimi në Facebook.

Më herët të martën, përfaqësues të shqiptarëve të Luginës së Preshevës thanë se Ministria për të Drejtat e Njeriut dhe Minoriteteve e Serbisë ka bërë thirrje për anulimin e një konkursi për subvencionimin e kulturave bujqësore nga një fond i Qeverisë së Kosovës.

Qeveria e Kosovës i ndau 1 milion euro për subvencione në sektorin e bujqësisë për shqiptarët në Preshevë, Bujanoc dhe Medvegjë për vitin 2024, tha në tetor kryetarja e Preshevës, Ardita Sinani.

Bislimi tha se donacioni i Qeverisë kosovare synonte ta përmirësonte jetën e komunitetit shqiptar dhe të mbështeste zhvillimin ekonomik në Luginën e Preshevës, duke ditur se “edhe më tej komunat e Preshevës, Bujanocit dhe Medvegjës janë ndër komunat më të pazhvilluara në Serbi, ndër më të varfrat me papunësi të lartë e veçanërisht tek të rinjtë”.

Këshilli Kombëtar Shqiptar kishte shpallur thirrjen publike për bujqit më 26 tetor 2024 dhe prej atëherë i ka pranuar mbi 1.178 aplikime, sipas Bislimit.

“Pikërisht më 10 dhjetor, në Ditën Ndërkombëtare të të Drejtave të Njeriut, shqiptarëve në Preshevë, Bujanoc dhe Medvegjë i është mbivendosur privimi nga mundësia e ndihmës nga Republika e Kosovës”, tha Bislimi.

Ai tha se Serbia nuk ka asnjë të drejtë ta pengojë mbështetjen e Kosovës për shqiptarët e Luginës së Preshevës dhe i bëri thirrja bashkësisë ndërkombëtare të reagojë dhe “të veprojnë për të mbrojtur të drejtat e shqiptarëve në Luginën e Preshevës”.

Të martën në mëngjes, kryetari i Këshillit Kombëtar Shqiptar (KKSH) në Luginën e Preshevës, Nevzad Lutfiu, tha se Ministria serbe i ka kërkuar KKSH-së ta anulojë konkursin.

“Ministria në fjalë kërkon që konkursi të anulohet (të shfuqizohet vendimi i KKSH-së), nëse ne nuk e shfuqizojmë këtë vendim atëherë atë do ta bëj vet Ministria, me pretekstin se vendimi është i jashtëligjshëm thuhet në kundërpërgjigjen e Ministrisë”, shkroi ai në Facebook.

Luftiu nguli këmbë se Këshilli nuk do ta shfuqizojë konkursin, duke shtuar se “pas konsultimit me Qeverinë e Kosovës do të njoftoheni me hapat e mëtutjeshëm”.

Sinani tha se ajo, si kryetare e Preshevës, e dënon “ fuqishëm këtë veprim diskriminues” dhe shprehu mbështetjen e saj për KKSH-në dhe të gjitha institucionet shqiptare “që punojnë për të mbrojtur interesat e popullatës sonë”.

Shqiptarët që jetojnë në komunat në jug të Serbisë, Preshevë, Medvegjë dhe Bujanoc – që njihen me termin Lugina e Preshevës – shpesh ankohen për praktika diskriminuese nga shteti serb, teksa zyrtarët në Qeverinë e Kosovës u kanë bërë jehonë këtyre akuzave.

Shqiptarët në Luginë të Preshevës për vite të tëra ankohen po ashtu për pasivizim të adresave të banimit dhe gjatë këtij viti kanë protestuar disa herë duke kërkuar më shumë të drejta.

Banorët e Luginës dhe udhëheqës të komunave atje kanë kërkuar disa herë që të ketë prani të mekanizmave ndërkombëtarë, në mënyrë që të monitorohen kushtet e jetesës në atë pjesë./REL





Lajmet e fundit nga