E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

I akuzuar për abuzim seksual/ Arrestohet në Rumani, Andrew Tate

12 Mars 2024, 10:39, Kosova & Bota CNA

"Figura kontroverse, Andrew Tate, është arrestuar në Rumani dhe ndaj tij është lëshuar fletarrestim nga Britania e Madhe", njoftoi të martën zëdhënësja e tij, Mateea Petrescu.

"Tate, 37 vjeç, dhe vëllai i tij Tristan Tate, u arrestuan të hënën mbrëma nën akuzat për agresion seksual, në një rast në Britani të Madhe nga vitet 2012-2015", tha Petrescu.

Ajo tha se Gjykata e Apelit në Bukuresht do të marrë “vendim të rëndësishëm” të martën se a ta zbatojë apo jo fletarrestimin e lëshuar nga Britania e Madhe.

Katër gra e raportuan influencerin Tate tek autoritetet britanike, duke e akuzuar për dhunë seksuale dhe fizike, por prokuroria britanike vendosi të mos ngrejë aktakuzë ndaj tij. Viktimat e dyshuara vendosën pastaj të mbledhin të holla për t’i mbuluar shpenzimet ligjore për të ngritur padi civile kundër Tate.

“Ne i dorëzuam provat tona për veprimet e tmerrshme të dhunës që e përjetuam dhe pritëm për veprime. Por, katër vjet më vonë, na thanë se autoritetet britanike nuk do ta përndjekin atë”, thanë ato. “Kjo është rruga jonë e vetme për ta mbajtur atë përgjegjës”.

Tate akuzohet në një rast tjetër në Rumani për përdhunim, trafikim me njerëz dhe për krijimin e një grupi kriminal për t’i shfrytëzuar seksualisht gratë.

Ai ishte arrestuar në Bukuresht në dhjetor 2022 bashkë me vëllain dhe dy gra rumune. Prokuroria rumune ngriti aktakuzë ndaj tyre verën e kaluar. Ata i mohojnë akuzat.

Andrew Tate, i cili i ka 8.7 milionë ndjekës në rrjetin social "X", ka pretenduar vazhdimisht se prokurorët rumunë nuk kanë prova kundër tij dhe se ka një konspiracion politik për ta heshtur atë.

Ai ka qenë i pezulluar nga rrjete të ndryshme sociale në të kaluarën, për shkak të shprehjes së qëndrimeve mizogjene dhe për shkak të gjuhës së urrejtjes.

Pas arrestimit në Rumani, vëllezërit Tate u mbajtën për tre muaj në paraburgim, para se të zhvendoseshin në arrest shtëpiak. Ata u liruan më vonë, por e kanë të kufizuar lëvizjen vetëm brenda komunës së Bukureshtit dhe kontit të afërt Ilafov./ Rel