E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Gjyqi ndaj Ekrem Imamoglu/ Gjykata lë në paraburgim ish-kryebashkiakun e Stambollit

13 Maj 2026, 20:34, Kosova & Bota CNA

Gjyqi ndaj Ekrem Imamoglu/ Gjykata lë në paraburgim ish-kryebashkiakun

Gjykata e 25-të Penale e Stambollit ka vendosur të zgjasë masën e paraburgimit për ish-kryetarin e bashkisë së Stambollit, Ekrem Imamoglu, dhe tre bashkëpunëtorët e tij, Huseyin Gün, Necati Özkan dhe Merdan Yanardag. Gjatë seancës së mbajtur në ambientet e Burgut të Sigurisë së Lartë Marmara, gjykata refuzoi kërkesat e mbrojtjes për lirim, duke argumentuar se rreziku i largimit dhe nevoja për mbledhjen e provave bëjnë që masat e tjera kufizuese të jenë të pamjaftueshme në këtë fazë.

Procesi gjyqësor është shtyrë zyrtarisht për datën 6 korrik, ndërkohë që të pandehurit vazhdojnë të përballen me akuzën e rëndë të "spiunazhit politik", e cila parashikon një dënim nga 15 deri në 20 vite burgim.

Aktakuza e përgatitur nga Prokuroria Publike e Stambollit pretendon se midis viteve 2019 dhe 2025, të dhënat personale të qytetarëve dhe dokumente konfidenciale të bashkisë janë vjedhur dhe transferuar në platformën "Ostin", e cila operon në rrjetin e errët (dark web). Sipas prokurorisë, ky informacion është përdorur për analiza nën drejtimin e shërbimeve të huaja të inteligjencës, ku përmendet edhe bashkëpunimi me shtetasin amerikan Aaron Barr.

Në dosje theksohet se Imamoglu ka autorizuar personalisht aksesin e plotë të ekspertëve të jashtëm në sistemet e bashkisë, duke i hapur rrugë rrjedhjes së korrespondencave të brendshme me qëllim fitimin e avantazhit politik.

Për të vërtetuar këto pretendime, gjykata ka autorizuar Shërbimin Sekret Turk dhe Drejtorinë Antiterrorizëm që të kryejnë një shqyrtim të thelluar të serverave dhe dosjeve të sigurisë së Bashkisë Metropolitane të Stambollit.

Gjithashtu, Autoritetit të Teknologjive të Informacionit i është kërkuar të dorëzojë të dhënat mbi adresat IP dhe regjistrat e aksesit për të përcaktuar nëse ka pasur ndërhyrje të paautorizuara. Ndërsa Imamoglu, i cili u shkarkua nga detyra pas arrestimit, i ka cilësuar akuzat si të motivuara politikisht, hetimet po zgjerohen për të verifikuar shtrirjen e plotë të këtij skandali të dyshuar spiunazhi.