E fundit!

13:08 Aktualitet

Ndërprerja e energjisë në Maternitetin e Durrësit/ Spitali Rajonal sqarim publik

Spitali Rajonal Durrës ka reaguar pas situatës së krijuar ...

Francë/ Marrëveshje kundër së djathtës?

2 Korrik 2024, 08:41, Kosova & Bota CNA

Emmanuel Macron

Rezultati është katastrofal për aleancën e Presidentit Emmanuel Macron në Francë. Shumë më vonë sesa ishte paralajmëruar fillimisht, kryeministri Gabriel Attal doli përpara rezidencës së tij zyrtare dhe deklaroi: "Mësimi i kësaj mbrëmje është se Rassemblement National nuk ka qenë kurrë më parë pranë portave të pushtetit." „Parlamenti ynë nuk ka pasur kurrë një rrezik të tillë për t'u dominuar nga e djathta ekstreme."

Fituesi i qartë i raundit të parë është - siç pritej - Rassemblement National i ekstremit të djathtë (RN) dhe aleatët e tij. Ata marrin 33 për qind të votave dhe me shumë gjasa do të përpiqen që pjesa e tyre e vendeve në Parlament të rritet në mënyrë dramatike. Kampi qendror i Macron-it mori 20 për qind.

Le Pen: Francezët duan ndryshim

"Demokracia foli, francezët na zgjodhën në krye dhe pothuajse e shuan kampin e Macron-it," deklaroi Marine le Pen, tri herë kandidate për presidente të Francës nga RN, para mbështetësve të saj. Sipas saj, pjesëmarrja e lartë e bën këtë rezultat edhe më të vlefshëm.

Në total, pak më shumë se nëntë milionë njerëz votuan për RN. Aleanca e krahut të majtë Fronti i Ri Popullor fitoi gjithashtu vota dhe, me 28 për qind, shumë kandidatë të krahut të majtë kualifikohen për balotazhin e së dielës së ardhshme.

Por duke qenë se zgjedhjet zhvillohen me shumicë votash, vetëm ai që ka marrë shumicën absolute në zonën e tij zgjedhore në raundin e parë ose që ka dalë i pari në raundin e dytë, merr një vend në Parlament. Sipas parimit: fituesi i merr të gjitha.

E majta dhe partia e Macron-it po afrohen

Aleanca e majtë kishte treguar që më parë se donte të tërhiqej nga të gjitha zonat ku një kandidat i Macron-it është në pozicionin më të mirë për të mposhtur Rassemblement National. Ky qëndrim u konfirmua zyrtarisht në mbrëmjen e djeshme. Referendumi do të vendosë për pyetjen e mëposhtme, tha zëdhënësi i të moderuarve brenda Aleancës së majtë, Raphawl Glucksmann: "A duam që e djathta ekstreme të marrë pushtetin përmes kutive të votimit për herë të parë në këtë vend?"

Në fakt, Presidenti Macron kishte deklaruar vazhdimisht gjatë fushatës elektorale se aleanca e majtë ishte po aq e rrezikshme sa aleanca e ekstremit të djathtë. Vetëm në orët e vona të mbrëmjes kryeministri Attal dha dritën jeshile. Edhe kampi presidencial tani është gati të tërheqë kandidatët e tij, nëse një kandidat nga Fronti Popullor i majtë ka shans më të madh për të fituar kundër RN.

Një votë vendimtare

Në mbrëmje lideri i RN, Jordan Bardella, e deklaroi veten si të vetmen mburojë të vërtetë kundër së Majtës.

"Është krejtësisht e qartë se çfarë është në rrezik këtu," tha ai. "Nga njëra anë, aleanca e tmerrshme e majtë që çon në rrëmujë, revoltë dhe rrënim. Nga ana tjetër, aleanca jonë e djathtë e unitetit kombëtar. Ne jemi tani e vetmja mburojë republikane dhe patriotike e aftë për të mbrojtur institucionet tona, për të rivendosur sigurinë, për të garantuar drejtësinë tatimore dhe për të mbrojtur punën".

Vetëm pas balotazhit vendimtar të së dielës së ardhshme do të dihet nëse një nga aleancat mund të sigurojë një shumicë absolute - ose nëse një kamp i shumicës së thjeshtë do të duhet të përpiqet të krijojë aleanca të ndryshueshme për të qeverisur vendin./DW