web counter
LEXO PA REKLAMA!

SHKARKO APP

App Store
Google Play

Blinken-Izraelit: Mbrojtja e civilëve duhet të jetë përparësia juaj

14 Mars 2024, 15:22, Kosova & Bota CNA

Blinken-Izraelit: Mbrojtja e civilëve duhet të jetë

Sekretari amerikan i Shtetit, Antony Blinken, tha të mërkurën se siguria e civilëve palestinezë duhet të jetë “përparësi” e Izraelit në luftën ndaj Hamasit në Gazë.

“Po ndjekim me vëmendje veprimet e qeverisë së Izraelit për t’u siguruar që mbrojtja e civilëve dhe ndihma e nevojshme për ta, të jenë përparësi”, u tha gazetarëve zoti Blinken pas një mbledhjeje virtuale me homologët ndërkombëtarë.

“Kjo duhet të jetë puna e tyre e parë, edhe ndërsa ndërmarrin hapat e nevojshëm për të mbrojtur vendin dhe për t’u përballur me kërcënimin që paraqet Hamasi”, tha zoti Blinken.

Kryediplomati amerikan dhe ministrat e Qipros, Emirateve të Bashkuara Arabe, Katarit, vendeve të Bashkimit Evropian dhe Kombeve të Bashkuara u takuan përmes një videokonference për të diskutuar për një korridor detar për dërgimin e ndihmave në Gazë.

“Përmes këtij korridori do të bëhet e mundur shpërndarja e 2 milionë vakteve ushqimore çdo ditë, po ashtu do të shpërndahen ilaçe, ujë dhe pajisje të tjera kritike humanitare”, tha zoti Blinken.

Ushtria e Shteteve të Bashkuara dërgoi një anije në Mesdhe për të ndërtuar një port të përkohshëm në Gazë për të mundësuar kalimin e ndihmës, por ka njoftuar se për ngritjen e portit nevojiten dy muaj kohë.

Sot, Ministria e Shëndetësisë në Gazë tha se sulmet izraelite vranë 6 palestinezë dhe plagosën dhjetëra të tjerë ndërsa banorë të qytetit të Gazës ishin mbledhur për të pritur kamionët me ndihmë humanitare.

Izraeli mohon se pengon dërgimin e ndihmave humitare në Gazë dhe fajëson agjencitë e ndihmave për vonesat në shpërndarje./ VOA





Lajmet e fundit nga