Yield-et e bonove 12-mujore në rënie, prekin nivelin më të ulët që nga janari

15 Maj 2024, 08:10, Ekonomi CNA

Yield-et e bonove 12-mujore në rënie, prekin nivelin më të

Yield-et e bonove 12-mujore pësuan rënie në ankandin e kësaj jave.

Sipas të dhënave nga Banka e Shqipërisë, yield-i mesatar i ponderuar zbriti në 3.54%, nga 3.66% që kishte qenë në ankandin e mëparshëm. Nga tetë miliardë lekë që ishte shuma e shpallur për financim nga Ministria e Financave, vlera totale e kërkesave arriti në pothuajse 11.9 miliardë lekë.

Pro rata apo pjesa e pranuar e kërkesave konkurruese rezultoi 45.05%. Megjithatë, pro rata e ulët dhe në një masë të madhe edhe rënia e yield-eve u përcaktua nga pjesa e lartë e rezervuar në ankand për Bankën e Shqipërisë, që ishte katër miliardë lekë ose sa gjysma e shumës së shpallur nga Ministria e Financave.

Sidoqoftë, yield-i i bonove 12-mujore është në nivelet më të ulëta që prej muajit janar. Gjithashtu, ai ngelet në nivele më të ulëta krahasuar me të njëjtën periudhë të një viti më parë, kur kishte qenë në nivelin 3.75%.

Rënia e inflacionit dhe mbajtja e normave relativisht të ulëta të interesit nga Banka e Shqipërisë është përcjellë edhe në ecurinë e tregut të instrumenteve të borxhit të qeverisë.

Në veçanti bonot e thesarit, po rezultojnë me yield-e pranë normës bazë të interesit, ndërsa bonot me afat më të shkurtër maturimi kanë zbritur madje edhe poshtë normës bazë.

Një rritje shumë e lehtë e yield-eve u vërejt gjatë tremujorit të parë, por kryesisht për shkak të përqendrimit të lartë të huamarrjes së qeverisë në këtë periudhë. Më tej, yield-et duket se janë stabiliuar, madje me një tendencë të lehtë në rënieje për shumicën e instrumenteve.

Inflacioni këtë vit ka ardhur në rënie të vazhdueshme dhe për prillin zbriti në 2.1%, niveli më i ulët në tre vjet. Banka e Shqipërisë ka reaguar duke mbajtur të pandryshuar normën bazë të interesit në 3.25%.

Yield-et e bonove 12-mujore në rënie, prekin nivelin më të

Pas mbledhjes së fundit të Këshillit Mbikëqyrës, Guvernatori Sejko theksoi megjithatë se kjo rënie e shpejtë e inflacionit i detyrohet faktorëve të ofertës dhe kryesisht efektit të rënies së çmimeve të mallrave të importuara, por edhe forcimit të lekut në kursin e këmbimit. Sipas tij, kjo rënie e shpejtë e inflacionit pritet të jetë kalimtare.

Megjithatë, për momentin inflacioni i ulët duket se i ka korrektuar në rënie edhe pritshmëritë për normat e interesit.

Rënia e titujve të borxhit të qeverisë dhe veçanërisht e bonove 12-mujore, që janë insturmenti kryesor benchmark, përcakton direkt edhe kostot e huamarrjes së sektorit privat. Ulja e kostove të kredisë në lekë ka gjasa të mbajë në nivele të larta ecurinë e kredisë për ekonominë.

Të dhënat e tremujorit të parë 2024 treguan se vlera e kredisë së re të disbursuar nga sektori bankar arriti vlerën e 82.8 miliardë lekëve, në rritje me pothuajse 30% krahasuar me tremujorin e parë të vitit të kaluar./ Monitor.al