E fundit!

14:51 Aktualitet

Pas më shumë se 5 orësh, Igli Tare del nga SPAK

Ish-futbollisti i Kombëtares shqiptare të futbollit, Igli ...

Ngadalësohet rritja e të ardhurave buxhetore në shtator

20 Tetor 2023, 15:24, Ekonomi CNA

Në shtator, tatimet e doganat mblodhën rreth 52 miliardë lekë të ardhura, sipas të dhënave të Ministrisë së Financave. Në krahasim me të njëjtën periudhë të një viti më parë rritja e të ardhurave është 4.5%, më e ulëta e këtij viti.

Në shtator inflacioni u rrit lehtë në 4.1%, ndërsa ekonomia për 6-mujorin e parë u rrit mesatarisht me 3%, çka tregon se rritja reale e të ardhurave ishte negative. Ngadalësimi është ndikuar kryesisht nga ecuria e doganave që janë prekur nga rënia e çmimeve të mallrave të importuara.

Në total, sipas një njoftimi të Ministrisë së Financave për gjithë 9 mujorin, të ardhurat totale për 9 –mujorin u realizuan në masën 477.25 miliardë Lekë ose 101.5% të planit të së njëjtës periudhë. Krahasuar me një vit më parë të ardhurat janë rritur me +51 miliardë lekë ose +12% më shumë.

Ritmet e rritjes së të ardhurave janë ngadalësuar teksa për 8 mujorin u zgjeruan me 12.9% dhe për 6 mujorin me 14.5%.

Tatim fitimi, tatimi mbi të ardhurat personale dhe TVSH-ja vijojnë të mbajnë peshën kryesore në rritjen e të ardhurave në buxhet.

Shpenzimet e përgjithshme publike, për 9 – mujorin e vitit 2023, arritën në rreth 425.65 miliardë Lekë me një realizim në 92.2% të planit të së njëjtës periudhë. Krahasuar me vitin 2022 shpenzimet e përgjithshme publike rezultojnë +3.8 përqind më të larta ose rreth +15.7 miliardë Lekë më shumë.

Niveli i sufiçitit për periudhën 9 – mujore të vitit 2023 rezultoi në rreth 51.6 miliardë lekë nga rreth 8.5 miliardë lekë sufiçit i planifikuar. Krahasuar me të njëjtën periudhë të një viti më parë, niveli i sufiçitit rezultonte në masën prej rreth 16.29 miliardë Lekë.

Të Ardhurat

Sipas njoftimit të Ministrisë së FInancave, Të ardhurat totale për 9 – mujorin e vitit 2023 u realizuan në masën 477.25 miliardë Lekë ose 101.5% të planit të së njëjtës periudhë. Krahasuar me një vit më parë të ardhurat janë rritur me +51 miliardë lekë ose +12% më shumë.

Të ardhurat e arkëtuara nga Drejtoria e Përgjithshme e Tatimeve dhe Drejtoria e Përgjithshme e Doganave (përfshirë edhe Kontributet e mbledhura nga DPT), u vlerësuan në masën 415 miliardë lekë, 35.1 miliardë ose 9.2% më shumë, krahasuar me të njëjtën periudhë të vitit 2022, si dhe 11.2 miliardë ose 2.8% më shumë se plani 9-mujor për vitin 2023.

Të ardhurat doganore (të ardhurat nga TVSH në import, akciza, taksa doganore dhe renta minerare) u realizuan në vlerën 159.8 miliardë lekë, 4.6 miliardë lekë ose 2.8% më pak se 9 mujori 2022, si dhe 13.6 miliardë lekë ose 7.8% më pak se plani i të ardhurave doganore për 9 mujorin e vitit 2023.

Të ardhurat nga TVSH në import për 9 mujorin rezultojnë 107.7 miliardë lekë, 7.7 miliardë lekë ose 6.7% më pak se e njëjta periudhë e një viti më parë, si dhe 12.3 miliardë ose 10.3% më pak se plani për 9-mujorin 2023.

Të ardhurat nga akciza janë realizuar në masën 43.1 miliardë lekë, 3.7 miliardë lekë ose 9.5% më shumë se e njëjta periudhë e vitit 2022, si dhe 461 milionë lekë ose 1.1% më pak se plani i akcizës për 9-mujorin 2023.

Të ardhurat nga renta minerare në eksport janë realizuar në vlerën 2.3 miliardë lekë, 1 miliardë ose 31.2% më pak krahasuar me të njëjtën periudhë të vitit të kaluar dhe realizim në masën 65.2% kundrejt planit për 9-mujorin 2023.

Të ardhurat nga taksat doganore janë arkëtuar në vlerën 6.7 miliardë lekë, 425 milionë lekë ose 6.8% më shumë se 9 mujori 2022, si dhe realizim në masën 106.1% kundrejt planit.

Të ardhurat tatimore (të ardhurat nga TVSH neto në vend, tatimi mbi fitimin, tatimi mbi të ardhurat personale, taksat nacionale dhe kontributet e mbledhura nga DPT), për 9 mujorin 2023 u realizuan në masën 255.2 miliardë lekë, 39.7 miliardë ose 18.4% më shumë se 9 mujori i vitit të kaluar, si dhe 24.8 miliardë lekë, ose 10.8% më shumë se plani i 9 mujorit 2023.

Të ardhurat nga TVSH e arkëtuar (neto), u realizua në masën 35.8 miliardë lekë, 7.4 miliardë ose 26% më shumë se 9 mujori 2022, si dhe 4.6 miliardë ose 14.8% më shumë se plani i TVSH për t’u arkëtuar në 9 mujorin 2023. Rimbursimet për periudhën 9 mujore 2023 janë 14.6 miliardë lekë, 950 milionë lekë ose 7% më shumë se 9-mujori 2022, si dhe 1.3 miliardë lekë ose 9.7% më shumë se plani i rimbursimit të TVSH-së për 9-mujorin 2023.

Të ardhurat e mbledhura nga tatimi mbi fitimin u realizuan në masën 44.9 miliardë lekë 11 miliardë lekë, ose 32.4% më shumë se 9-mujori 2022, si dhe 9.4 miliardë lekë ose 26.5% më shumë se plani i 9-mujorit të vitit 2023 për Tatimin mbi Fitimin.

Tatimi mbi të ardhurat personale është arkëtuar në vlerën 43.8 miliardë lekë, 9.7 miliardë lekë ose 28.5% më shumë se 9-mujori 2022, si dhe 6.6 miliardë ose 17.7% më shumë se plani i 9-mujorit 2023.

Taksat nacionale, për periudhën 9-mujore 2023 u realizuan në masën 28 miliardë lekë, 3.9 miliardë lekë ose 12.1% më pak se 9-mujori 2022, si dhe 6.3 miliardë lekë ose 18.3% më pak se plani për 9-mujorin 2023.

Të ardhurat e mbledhura nga kontributet për sigurimet shoqërore dhe shëndetësore (të administruara nga DPT), u realizuan në masën 102.6 miliardë lekë, 15.4 miliardë lekë ose 17.7% më shumë se 9-mujori 2022, si dhe realizim 111.3% të planit për 9-mujorin 2023.

Shpenzimet

Shpenzimet e përgjithshme publike, për periudhën nëntë mujore të vitit 2023, arritën në rreth 425.65 miliardë Lekë me një realizim në masën 92.2% të planit të periudhës, ndërsa krahasuar me të njëjtën periudhë të vitit 2022 ky zë ka rezultuar 3.8% më i lartë ose rreth 15.7 miliardë Lekë më shumë. Në terma vjetorë, shpenzimet e përgjithshme për periudhën 9-mujore të vitit 2023 u realizuan në masën 61% të planit vjetor.

Shpenzimet korente dhe ato kapitale, kanë shënuar një realizim respektivisht në masën 98% dhe 70.8% të planit të periudhës. Ndërkohë që, në terma vjetorë ato janë realizuar përkatësisht në 69.4% dhe 37.2% të tij.

Shpenzimet korente për periudhën 9-mujore të vitit 2023 rezultuan në rreth 379.4 miliardë Lekë, ndërsa krahasuar me të njëjtën periudhë të një viti më parë ky zë ka rezultuar 10.6% më i lartë ose rreth 36.4 miliard LEK më shumë.

Shpenzimet kapitale për periudhën 9-mujore të vitit 2023 paraqesin një realizim në masën rreth 46.1 miliardë Lekë. Krahasuar me të njëjtën periudhë të vitit 2022, ky zë rezulton 9.6% më i ulët ose rreth 4.9 miliardë Lekë më pak.

Niveli i suficitit për periudhën 9-mujore të vitit 2023 rezultoi në rreth 51.6 miliardë Lekë nga rreth 8.5 miliardë Lekë suficit i planifikuar për këtë periudhë. Krahasuar me të njëjtën periudhë të një viti më parë niveli i suficitit ka rezultuar rreth 216.8% më i lartë ose rreth 35.3 miliardë Lekë më shumë./Monitor.al