web counter
LEXO PA REKLAMA!

SHKARKO APP

App Store
Google Play

E fundit!

x

Matësit inteligjentë, drafti: Brenda 7 vitesh te 80% e konsumatorëve, kostot te tarifa

28 Prill 2026, 07:20, Ekonomi CNA

Matësit inteligjentë, drafti: Brenda 7 vitesh te 80% e

Tema e matësve inteligjentë të energjisë është rikthyer edhe një herë në vëmendje. Draft ligji i ri “Për sektorin e energjisë elektike” parashikon një nen të veçantë për sistemet inteligjente të matjes duke vendosur edhe piketat e një plani konkret.

Konkretisht në nenin 91 thuhet se vendosja e këtyre pajisjeve nuk do të bëhet menjëherë, por pas një analize të plotë të kostove dhe përfitimeve.

Sipas nenit Enti Rregullator i Energjisë (ERE) do të përcaktojë rregullat teknike të sistemit, ndërsa operatori i shpërndarjes do të bëjë llogaritjet ekonomike për të parë nëse investimi është i leverdishëm për ta zbatuar në shkallë të gjerë.

Nëse analiza del pozitive, parashikohet që të nisë një plan i detajuar 10-vjeçar për instalimin e matësve inteligjentë në të gjithë vendin. Sipas draftit, të paktën 80% e konsumatorëve duhet të pajisen me këta matës brenda 7 viteve nga fillimi i procesit.

Kostoja e projektit do të shpërndahet gradualisht duke nënkuptuar kështu ndryshim të tarifave teksa ERE do të monitorojë gjithashtu nëse konsumatorët po përfitojnë realisht nga sistemi i ri.

“Nëse promovimi i shtrirjes sistematike të sistemeve inteligjente të matjes vlerësohet pozitivisht si rezultat i vlerësimit të përmendur në pikën 2 të këtij neni, Operatori i Sistemit të Shpërndarjes do të kryejë vendosjen e matësve inteligjentë në përputhje me kërkesat teknike dhe funksionale të përcaktuara nga ERE.

Si rezultat i një vendosjeje të tillë, të paktën 80% e klientëve fundorë do të pajisen me matës inteligjentë brenda shtatë viteve nga data e vlerësimit pozitiv.

Në rast të një vendosjeje sistematike sipas pikës 4 më sipër, ERE do të sigurojë që klientët fundorë të kontribuojnë në kostot e lidhura me vendosjen në mënyrë transparente dhe jodiskriminuese nëpërmjet tarifave të rrjetit, duke marrë parasysh përfitime për të gjithë zinxhirin e vlerës” thuhet në nenin 91.

Nga ana tjetër neni parashikon se nëse analiza del negative, sistemi nuk do të zbatohet në masë, por çdo qytetar do të ketë të drejtë të kërkojë instalimin e një matësi inteligjent, duke paguar vetë koston përkatëse. Operatori i shpërndarjes do të duhet të bëjë këtë rivlerësim çdo katër vjet, në varësi të zhvillimeve teknologjike dhe tregut, ndërsa ERE do të raportojë ndryshimet në nivel rajonal.

Matësit ekzistues do të vazhdojnë të përdoren, por vetëm ata që plotësojnë kërkesat e reja do të lejohen të qëndrojnë në funksion deri në fund të jetës së tyre. Të tjerët do të duhet të zëvendësohen deri në vitin 2031./ Revista Monitor





Lajmet e fundit nga