Drafti, operatorët turistikë duhet të kenë drejtues teknikë të kualifikuar, kushtet

19 Mars 2025, 14:49, Ekonomi CNA

Drafti, operatorët turistikë duhet të kenë drejtues

Operatorët turistikë duhet të kenë drejtues teknik të kualifikuar në mënyrë që të ofrojnë shërbime cilësore.

Të paktën ky është synimi i ndryshimeve në projektvendimin “Për disa ndryshime në vendimin nr. 710, datë 12.10.2016 “Për miratimin e rregullores “Për kërkesat dhe kriteret për ushtrimin e veprimtarisë së operatorit turistik” nxjerrë për konsultim nga Ministria e Turizmit dhe Mjedisit.

Në relacionin që shoqëron këtë draft shpjegohet se operatori turistik përfaqësohet gjatë ushtrimit të veprimtarisë nga përfaqësuesi ligjor (administratori) dhe drejtuesi teknik të cilët duhet të plotësojnë disa kritere të përcaktuara me ligjin e vitit 2015, por edhe disa shtesa të tjera.

Kështu në nenin 3 nënvizohet se së pari drejtuesi teknik duhet të vërtetojë se ka pasur eksperienca pune në veprimtari të tilla turistike si: agjenci udhëtimi, strukturë akomoduese, operator turistik, operator turistik detar apo udhërrëfyes turistik, apo dhe në fusha të tjera në fushën e turizmit.

Së dyti drejtuesi teknik duhet të jetë i punësuar vetëm në një operator turistik, në cilësinë e drejtuesit teknik.

Së treti drejtuesi teknik, për nevoja të ushtrimit të veprimtarisë së tij, duhet të vërtetojë se:

I) zotëron një gjuhë të huaj, nëpërmjet një dëshmie, certifikate, diplome ose një dokumenti të ngjashëm me to, lëshuar nga subjekti i certifikuar nga ministria përgjegjëse për arsimin për organizimin e testimeve ndërkombëtare, në nivelin B2, ose nga institucioni i arsimit të lartë publik ose privat, që është miratuar nga ministria përgjegjëse për arsimin për të ofruar programe të akredituara të gjuhëve të huaja, me vlerësim mbi/edhe notën 7 (shtatë);

II) zotëron një gjuhë të huaj të dytë, nëpërmjet një dëshmie, certifikate, diplome ose një dokumenti të ngjashëm me to, lëshuar nga subjekti i certifikuar nga ministria përgjegjëse për arsimin për organizimin e testimeve ndërkombëtare, në nivelin B1, ose nga institucioni i arsimit të lartë publik ose privat, që është miratuar nga ministria përgjegjëse për arsimin për të ofruar programe të akredituara të gjuhëve të huaja, me vlerësim mbi/edhe notën 6 (gjashtë).

Së katërti përfaqësuesi ligjor dhe drejtuesi teknik, në çdo rast, janë përgjegjës për zbatimin e dispozitave të kësaj rregulloreje.”/ Revista Monitor