Hijet e Beqajt në një kompani farmaceutike

4 Korrik 2024, 20:24, Denoncim CNA

Hijet e Beqajt në një kompani farmaceutike

Ilir Beqaj, burimi LSA

Ilir Beqaj u arrestua këtë të enjte me urdhër të SPAK-ut pas vendimit të gjykatës në lidhje me disa hetime intensive, filluar në vitin 2023, nën akuzën “korrupsion pasiv i funksionarëve shetërorë”, “korrupsion aktiv i funksionarëve publikë”, “mosdeklarim dhe fshehje pasurie”, “mashtrim kryer në bashkëpunim” dhe “shkelje të barazisë në tendera”. (Lexo këtu)

Në hetimet e SPAK-ut, gjithçka kalon nga fondet e SASPAC, ku Ilir Beqaj ka qenë drejtor i përgjithshëm.

Sipas hetimeve të SPAK-ut, Ilir Beqaj ka shkelur të paktën 5 herë Kodin Penal, duke rezultuar ashtu siç është akuzuar si një nga njerëzit më të korruptuar të politikës. (Lexo këtu)

Ilir Beqaj, burimi LSA

Ilir Beqaj nuk fillon dhe nuk mbaron te SASPAC

Çështja Ilir Beqaj, e hetuar nga SPAK-u, nuk fillon dhe nuk mbaron te një institucion shtetëror ku ai ishte drejtor. Tentakulat e Beqajt janë shtrirë sa në Ministrinë e Shëndetësisë, në kompani farmaceutike apo në kompani IT.

Le të shohim disa lidhje të forta, që lidhin Ilir Beqajn e akuzuar sot nga SPAK-u me kompaninë “Delta Pharma”, të cilën nën zë politikanë dhe biznesmenë e quanin si një nga bizneset e Ilir Beqajt.

SPAK, në hetimin e tij përmend me iniciale shtetasin A. N., i cili në bashkëpunim me persona të tjerë në hetim, përfshi këtu edhe Ilir Beqajn, janë përfitues të fondeve publike nëpërmjet mekanizmave korruptive. (Lexo këtu)

SPAK, burimi LSA

Rezultonte se shtetasi A. N. të jetë Alfred Nikolla, bashkëshortja e të cilit quhet Alma Doçi Nikolla, e punësuar si shefe marketingu te kompania e përmendur më sipër, “Delta Pharma”.

Ajo që po heton SPAK-u dhe fondet e përfituara nga Ilir Beqaj janë shumë pak në lidhje me qindra milionët e përfituar nga kompania “Delta Pharma”, në pronësi të “Delta Holding”, ku aksionerë janë shtetasit Eduard Curraj dhe Dorian Sadiku, ky i fundit një lidhje e ngushtë e Ilir Beqajt dhe Alfred Nikollës. Dorian Sadiku i ka punësuar Alfred Nikollës edhe bashkëshorten.

Të dhënat e kompanisë “Delta Pharma”

Të dhënat e kompanisë “Delta Holding”

“Delta Pharma” është përfituese e rreth 40 kontratave publike, shumat shkojnë disa miliona euro. Gjithashtu ka shumë kontrata të përfituara edhe në bashkëpunim me kompani të tjera, ku kryesisht bie në sy “Mega Pharma”.

Ajo që po heton SPAK-u edhe njëherë është shumë pak në lidhje me abuzimet farmaceutike të bëra gjatë kohës kur Beqaj ka qenë ministër apo edhe më vonë me influencën e këtij të fundit.

Në dosjen e SPAK-ut përmendet edhe restorant “Gzona”, ku hetimet në fakt duhet të thellohen dhe nuk mund të ngelen thjesht te disa fonde të përfituara sepse të dhëna flasin për një lidhje të fortë të këtij restoranti me Dorian Sadikun e “Delta Pharma”-s

Lidhja e Ilir Beqajt nuk kalon thjesht dhe vetëm nga Alfred Nikolla, nëpërmjet bashkëshortes së tij të punësuar në “Delta Pharma”, por edhe nëpërmjet restorant “Gzona”, ku të dhëna jozyrtare flasin për një lidhje tjetër të Dorian Sadikut me Ilir Beqajn.

Ilir Beqaj, burimi LSA

Një tjetër pistë e lidhjeve të “Delta Pharma”-s me Ilir Beqajn që SPAK duhet ta hetojë është edhe rrjeti farmaceutik “Ditë e Natë”.

Të dhënat flasin se ish-ministri i Shëndetësisë, Ilir Beqaj nuk është vetëm përfituesi i disa fondeve në mënyrë korruptive dhe abuzive, por në rast se provohen tentakulat e oktapodit me kompani farmaceutike, rrjete farmacish dhe lidhje të tjera të forta me një grup personash, ekzistojnë të gjitha dyshimet se ai mund të jetë përtej një bashkëpunëtori apo mjeku, por edhe një ortak i fshehur dhe përfitues nga kompani të tjera private në emër të individëve të ndryshëm, të cilët kanë ushtruar akktivitet tregtar dhe në hijen e tyre qëndronte ish-ministri i Shëndetësisë./ CNA