Gjiganti mediatik në krizë/ Shkurton 1 mijë vende pune, zbardhet shkaku

Televizioni "BBC"

"BBC" njoftoi sot se do të shkurtojë 1000 vende pune si pjesë e një plani radikal për të përshpejtuar shërbimet dixhitale dhe për të kursyer para përballë shkurtimeve buxhetore të imponuara nga qeveria britanike, duke parashikuar shkrirjen e kanaleve televizive kombëtare dhe ndërkombëtare të lajmeve.

Gjiganti audioviziv britanik ka pasur presion së fundmi pas vendimit të qeverisë konservatore për të ngrirë tarifën speciale për dy vjet, duke krijuar një gropë të madhe në financa.

Masat, të shpallura në një deklaratë për shtyp, synojnë të kursejnë 500 milionë euro në vit, duke përfshirë 200 milionë euro për të mbuluar pjesën më të madhe të këtij deficiti.

Pjesa tjetër do të investohet në shërbimet dixhitale “për të ndërtuar një 'BBC' që u jep përparësi shërbimeve dixhitale, diçka vërtetë e re, një forcë pozitive për Mbretërinë e Bashkuar dhe botën”, i tha CEO, Tim Davy, në një mesazh stafit.

Është planifikuar të krijohet një kanal i vetëm "BBC News" për publikun britanik dhe ndërkombëtar, i cili aktualisht është i ndarë, “duke ruajtur aftësinë për të transmetuar përmbajtje të veçantë në varësi të ngjarjes”, shkruan "AbcNews".

Kanali për fëmijë "CBBC" (për fëmijë 6-12 vjeç) dhe ai kulturor "BBC 4" nuk do të transmetohen më, përmbajtja e të cilit do të transmetohet në internet.

Disa shërbime në gjuhë të huaja do të jenë gjithashtu të disponueshme vetëm në internet, ndërsa transmetimi i radios në distanca të gjata do të hiqet gradualisht pas konsultimit me shërbimet e transportit.

Në total, kjo do të rezultojë në 1000 vende pune më pak, për gjithsej rreth 22000 punonjës sot.

"BBC" po kalon një periudhë të vështirë për shkak të përmbysjes së zakoneve konsumatore të audiencës së saj dhe marrëdhënieve të vështira me qeverinë konservatore, të cilat u rënduan edhe më shumë së fundmi me emërimin e Nandin Doris në postin e ministres së Kulturës.

Kjo e fundit, e cila nuk e ka fshehur kurrë armiqësinë e saj ndaj transmetimit publik, ngriu tarifën speciale në janar për dy vjet dhe vuri në pikëpyetje mbijetesën afatgjatë të kësaj metode financimi.

"BBC" u themelua në vitin 1922 për qëllime edukative, informative dhe argëtuese. Ajo ka një rrjet radio global, kombëtar dhe lokal, version elektronik dhe rrjet televiziv drejtuar publikut të gjerë dhe gjithashtu përdoruesve që nuk janë të kënaqur me shërbimet e mediave komerciale. Gjiganti mediatik financohet nga tarifat që paguajnë të gjitha familjet që kanë televizor dhe kjo skemë supozohet të garantojë pavarësinë editoriale./CNA.al